اسلام آباد: دفتر خارجہ نے اسرائیلی قابض فورسز کے زیر حراست پاکستانی شہریوں کی واپسی سے متعلق وضاحتی بیان جاری کیا ہے جس میں سابق سینیٹر مشتاق احمد خان سمیت دیگر افراد کا ذکر کیا گیا ہے۔
ترجمان دفتر خارجہ کے مطابق صمود فلوٹیلا میں شریک پاکستانی شہریوں کے بارے میں ایک قریبی یورپی ملک کے سفارتی ذرائع سے تصدیق ہوئی ہے کہ سینیٹر مشتاق احمد اسرائیلی افواج کی تحویل میں محفوظ ہیں اور خیریت سے ہیں۔
بیان میں مزید کہا گیا کہ مقامی قانونی تقاضوں کے مطابق انہیں عدالت میں پیش کیا جائے گا اور ملک بدری کے احکامات سامنے آتے ہی ان کی جلد واپسی کو یقینی بنایا جائے گا۔
ترجمان نے واضح کیا کہ پاکستان اپنے بین الاقوامی شراکت داروں سے مسلسل رابطے میں ہے تاکہ اسرائیلی افواج کے غیر قانونی اقدامات کے نتیجے میں زیر حراست شہریوں کی فوری رہائی اور واپسی ممکن ہو سکے۔
وزارت خارجہ اس سے قبل اُن افراد کی واپسی کے لیے بھی اقدامات کر چکی ہے جو پہلے مرحلے میں فلوٹیلا سے الگ ہو گئے تھے۔ اس موقع پر پاکستان نے برادر ممالک کی تعاون پر ان کا شکریہ ادا کیا ہے۔
دفتر خارجہ کے مطابق حکومت پاکستان بیرونِ ملک اپنے شہریوں کی جان و مال کے تحفظ کے لیے ہر ممکن اقدام کر رہی ہے اور امکان ظاہر کیا گیا ہے کہ آئندہ چند روز میں واپسی کا یہ عمل مکمل ہو جائے گا۔
