اسلام آباد۔پاکستان اور چین نے سمعی و بصری اور نشریاتی شعبوں میں دو طرفہ تعاون کو وسعت دینے کے لیے ایک اہم مفاہمتی یادداشت پر دستخط کیے ہیں، جس کا مقصد میڈیا کے میدان میں مہارتوں اور تجربات کا باہمی تبادلہ ہے۔
معاہدے پر دستخط اسلام آباد میں ہوئے، جہاں پاکستان کی جانب سے وفاقی سیکرٹری اطلاعات عنبرین جان جبکہ چین کی طرف سے نیشنل ریڈیو اینڈ ٹیلی ویژن ایڈمنسٹریشن (NRTA) کے نائب وزیر اور پارٹی گروپ کے رکن ڈونگ شن نے دستخط کیے۔
سرکاری اعلامیے کے مطابق، یہ معاہدہ پاکستان اور چین کے روایتی میڈیا تعلقات کو مزید مضبوط بنانے کے ساتھ ساتھ جدید نشریاتی تقاضوں کے مطابق نئے شعبوں میں اشتراک کا دروازہ بھی کھولے گا۔
اس تعاون کے تحت دونوں ممالک کے میڈیا ادارے مشترکہ پروڈکشنز، معلومات اور مواد کے تبادلے، اور تربیتی پروگراموں میں ایک دوسرے کے ساتھ مل کر کام کریں گے۔ تکنیکی معاونت، جدید میڈیا ٹیکنالوجی کا اشتراک، اور پروفیشنل تربیت اس معاہدے کے کلیدی نکات میں شامل ہیں۔
فریقین نے اس بات پر اتفاق کیا کہ اس تعاون کے ذریعے نہ صرف پیشہ ورانہ معیار بہتر ہوگا بلکہ دونوں ملکوں کے عوام کو ایک دوسرے کی ثقافت، روایات اور ترقیاتی کامیابیوں سے قریب تر لایا جا سکے گا۔
یہ معاہدہ اس بات کی علامت ہے کہ پاکستان اور چین صرف معیشت یا تجارت تک محدود نہیں، بلکہ میڈیا اور ثقافت کے میدان میں بھی گہرے تعلقات استوار کرنے کے خواہاں ہیں۔ یہ پیش رفت دونوں ممالک کے “سافٹ امیج” کو بہتر بنانے اور عوامی سطح پر ہم آہنگی بڑھانے میں اہم کردار ادا کرے گی۔
