اسلام آباد ۔اداکاری، ہدایت کاری، پروڈکشن اور تحریر کے میدان میں نام بنانے والے شمعون عباسی نے ایک نجی ٹی وی چینل کے پروگرام میں اپنی ذاتی زندگی کے اس پہلو پر کھل کر بات کی، جسے وہ عموماً منظرِ عام پر نہیں لاتے۔
انٹرویو کے دوران شمعون عباسی نے اپنی چار شادیوں پر گفتگو کی، جن میں سے تین ازدواجی رشتے ناکامی کا شکار ہوئے۔ انہوں نے کہا، “نہ میں غلط تھا اور نہ ہی وہ، لیکن بعض اوقات دو اچھے انسان بھی ایک ساتھ زندگی نہیں گزار پاتے۔”
شمعون نے واضح کیا کہ ان کے رشتوں میں محبت ضرور تھی، مگر دونوں فریقین کے خواب اور زندگی کے اہداف مختلف تھے، جو ان تعلقات کی ناکامی کی اصل وجہ بنے۔
اداکار کا کہنا تھا کہ ان کی سابقہ بیویاں — جویریہ عباسی، حمیما ملک اور جاویریہ رندھاوا — شہرت، کامیابی اور مادی آسائشیں جلد حاصل کرنا چاہتی تھیں، جب کہ وہ خود ایک متوازن اور صبر و تحمل پر یقین رکھنے والے شخص تھے، جو وقت کے ساتھ کامیابی کو حاصل کرنے کا قائل تھے۔
انہوں نے یہ بھی تسلیم کیا کہ ان کی سابقہ شریکِ حیاتیں ان سے زیادہ کامیاب ثابت ہوئیں۔ شمعون نے اعتراف کیا، “جویریہ اور حمیما نے بہترین کیریئر بنایا، میں ان کے مقابلے میں پیچھے رہ گیا۔”
شمعون عباسی نے اس بات پر بھی زور دیا کہ انہوں نے کبھی اپنی کسی سابقہ بیوی کے خلاف کوئی تلخ بات نہیں کی بلکہ ہمیشہ ان کے لیے مثبت رائے رکھی۔ ان کا کہنا تھا، “مجھے خوشی ہے کہ وہ اپنے پیشہ ورانہ سفر میں مطمئن ہیں۔”
اداکار نے مزید بتایا کہ ان کے سابقہ شریک حیات سے اب بھی خوشگوار تعلقات قائم ہیں، اور اگر ضرورت پیش آئے تو وہ فون پر بات چیت بھی کر لیتے ہیں۔
اپنی موجودہ اہلیہ، اداکارہ شری شاہ، کے حوالے سے شمعون نے بتایا کہ ان کی شادی کو پانچ سال ہو چکے ہیں اور اب وہ ایک پُرسکون اور مطمئن ازدواجی زندگی گزار رہے ہیں۔ انہوں نے کہا، “یوں محسوس ہوتا ہے جیسے برسوں کی تلاش کے بعد وہ ہم آہنگی مل گئی ہے جس کی کمی پہلے محسوس ہوتی تھی۔”
یہ بات قابل ذکر ہے کہ شمعون عباسی اور شری شاہ نے اپنی شادی کو دو سال سے زیادہ عرصے تک نجی رکھا اور بالآخر 2023 میں اس کا اعلان کیا۔
یاد رہے کہ شمعون نے پہلی شادی 1997 میں اپنی کزن جویریہ عباسی سے کی تھی۔ یہ جوڑی شادی سے پہلے ایک ٹیلنٹ شو میں اول آئی تھی۔ یہ رشتہ 2009 تک قائم رہا اور طلاق پر اختتام پذیر ہوا۔
بعد ازاں انہوں نے حمیما ملک سے شادی کی، جو صرف ایک سال برقرار رہ سکی اور 2010 میں اختتام کو پہنچی۔ اسی برس انہوں نے جاویریہ رندھاوا سے تیسری شادی کی، جو 2014 میں طلاق پر ختم ہوئی۔
کئی سال بعد، 2023 میں، شمعون عباسی نے چوتھی بار اداکارہ شری شاہ کے ساتھ ازدواجی بندھن میں بندھنے کا اعلان کیا۔
