کرشمہ کپور کے سابق شوہر اور معروف بزنس مین سنجے کپور کی موت کے بعد 300 ارب روپے کی بزنس ایمپائر کے کنٹرول پر ان کی والدہ اور دوسری بیوی کے درمیان کشیدگی سنگین صورتحال اختیار کر گئی ہے۔
بھارت کی مشہور آٹو پارٹس کمپنی سونا کومسٹار کے چیئرمین سنجے کپور کے اچانک انتقال کے بعد کمپنی خاندانی اختلافات کا مرکز بن چکی ہے۔
سنجے کپور کی دوسری اہلیہ، پریا سچدیو کپور، کو کمپنی کے بورڈ آف ڈائریکٹرز میں شامل کیے جانے پر مرحوم کی والدہ رانی کپور نے سخت اعتراضات اٹھائے۔
25 جولائی کو ہونے والی سالانہ جنرل میٹنگ (AGM) میں پریا سچدیو کو نان ایگزیکٹو ڈائریکٹر مقرر کیا گیا، جس پر رانی کپور نے اجلاس ملتوی کرنے کی اپیل کی، مگر یہ درخواست مسترد کر دی گئی۔
رانی کپور نے الزام عائد کیا کہ ان کے بیٹے کی موت کے غم میں ہونے کے دوران ان سے بعض قانونی کاغذات پر دباؤ ڈال کر دستخط کروائے گئے۔
انہوں نے کمپنی بورڈ اور شیئر ہولڈرز کو بھیجے گئے ایک خط میں دعویٰ کیا کہ وہ اپنے مرحوم شوہر، ڈاکٹر سرندر کپور کی وصیت کے مطابق اس کاروباری سلطنت کی اصل وارث ہیں، اور انہوں نے اپنی بہو یا کسی اور کو وراثتی اختیارات نہیں سونپے۔
تاہم کمپنی نے ایک ریگولیٹری بیان میں رانی کپور کے دعووں کو مسترد کرتے ہوئے واضح کیا کہ وہ 2019 سے کمپنی کی شیئر ہولڈر نہیں رہیں، اور AGM قانونی تقاضوں کے مطابق منعقد کی گئی۔ کمپنی نے ان کے خط کو قانونی حیثیت سے عاری قرار دیا۔
یہ بھی قابل ذکر ہے کہ رانی کپور نے نہ صرف کمپنی میں قیادت پر سوالات اٹھائے، بلکہ اپنے بیٹے کی موت پر بھی شفاف تحقیقات کا مطالبہ کیا ہے۔
دستاویزی شواہد کے مطابق، سنجے کپور، RK فیملی ٹرسٹ کے واحد بینیفیشری تھے، جو کہ Aureus Investments کا کلیدی حصہ دار ادارہ ہے۔ اسی بنیاد پر پریا سچدیو کا بورڈ میں تقرر اس وقت تک قانونی طور پر مستحکم ہے، جب تک ٹرسٹ سے متعلق کوئی عدالتی چیلنج سامنے نہ آ جائے۔
یاد رہے کہ سنجے کپور نے 2003 میں اداکارہ کرشمہ کپور سے شادی کی تھی، جو 2016 میں طلاق پر منتج ہوئی۔ اس جوڑے کے دو بچے — سمایرا اور کیان — ہیں، جن سے طلاق کے بعد بھی سنجے باقاعدگی سے ملاقات کرتے رہے۔
بعد ازاں، سنجے نے ماڈل و کاروباری شخصیت پریا سچدیو سے دوسری شادی کی، اور 2018 میں ان کے ہاں بیٹے اذاریاس کی پیدائش ہوئی۔
