ورلڈ چیمپئن شپ آف لیجنڈز 2025 کے سیمی فائنل میں کرکٹ شائقین کو ایک بار پھر پاکستان اور بھارت کے درمیان سنسنی خیز مقابلے کا انتظار ہے، کیونکہ دونوں ٹیموں کا آمنا سامنا اب طے پا چکا ہے۔
دلچسپ امر یہ ہے کہ اسی ٹورنامنٹ کے گروپ مرحلے میں بھارتی لیجنڈز نے پاکستان کے خلاف میچ کھیلنے سے انکار کر دیا تھا، جس کے باعث وہ میچ منسوخ کرنا پڑا تھا۔
اب بھارتی ٹیم نے ویسٹ انڈیز چیمپئنز کو شکست دے کر سیمی فائنل میں جگہ حاصل کر لی ہے۔ سیمی فائنل 31 جولائی کو کھیلا جائے گا، جہاں بھارت کا مقابلہ گروپ اسٹیج کی ٹاپ ٹیم پاکستان چیمپئنز سے ہوگا۔
منگل کو ہونے والے اہم میچ میں ویسٹ انڈیز نے بھارت کو 145 رنز کا ہدف دیا، جو بھارتی ٹیم نے 13.2 اوورز میں 5 وکٹوں کے نقصان پر حاصل کر لیا۔ اس کامیابی نے بھارت کو بہتر رن ریٹ کی بنیاد پر سیمی فائنل میں پہنچا دیا۔
دوسری جانب پاکستان لیجنڈز نے اُسی دن آسٹریلیا کے خلاف 10 وکٹوں سے یکطرفہ فتح حاصل کی اور پوائنٹس ٹیبل پر پہلی پوزیشن حاصل کر لی۔
یہاں یہ بات قابلِ ذکر ہے کہ گروپ مرحلے میں جب پاکستان اور بھارت کا آمنا سامنا ہونا تھا، تو بھارتی کھلاڑیوں شیکھر دھون، یوسف پٹھان، عرفان پٹھان اور ہربجھن سنگھ نے شاہد آفریدی کی موجودگی پر اعتراض کرتے ہوئے میچ کھیلنے سے انکار کر دیا تھا، جس پر منتظمین نے افسوس کا اظہار کرتے ہوئے میچ منسوخ کر دیا۔
اب شائقین کی نظریں اس پر جمی ہوئی ہیں کہ آیا بھارتی ٹیم واقعی سیمی فائنل میں پاکستان کے خلاف میدان میں اترتی ہے یا پھر ایک مرتبہ پھر کسی نئے اعتراض کی بنیاد پر ٹاکرا مؤخر یا منسوخ کرنے کی کوشش کی جاتی ہے۔
میدان سجے گا یا پھر سیاست ایک بار پھر کھیل پر حاوی ہو گی — اس کا فیصلہ 31 جولائی کو ہو گا۔
