پاکستان کرکٹ بورڈ نے فخر زمان کی فٹنس مسائل کے پیش نظر سابق کپتان بابراعظم کو ٹی ٹوئنٹی اسکواڈ میں دوبارہ شامل کرنے پر سنجیدگی سے غور شروع کر دیا ہے۔
ذرائع کا کہنا ہے کہ بابراعظم کی ممکنہ واپسی آئندہ سہ فریقی سیریز اور ایشیا کپ 2025 کے لیے متوقع ہے۔ یاد رہے کہ فخر زمان کو ویسٹ انڈیز کے خلاف ٹی ٹوئنٹی سیریز کے دوران انجری کا سامنا کرنا پڑا تھا، جس کے باعث وہ نہ صرف ٹی ٹوئنٹی بلکہ ون ڈے سیریز سے بھی باہر ہو چکے ہیں۔
پاکستان کرکٹ بورڈ نے فخر زمان کو فوری طور پر نیشنل کرکٹ اکیڈمی لاہور رپورٹ کرنے کی ہدایت کی ہے، جہاں وہ بحالی (ری ہیب) کے عمل سے گزریں گے۔ ایشیا کپ میں ان کی شمولیت فی الحال غیر یقینی ہے، تاہم بورڈ ان کی فٹنس اور صحتیابی کے عمل پر مسلسل نظر رکھے ہوئے ہے اور متبادل منصوبے بھی تیار کیے جا رہے ہیں۔
ذرائع کے مطابق اگر فخر زمان مکمل طور پر فٹ نہ ہو سکے تو بابراعظم کو ایک مضبوط متبادل کے طور پر ٹیم میں شامل کیا جا سکتا ہے۔ تاہم ان کی واپسی کا انحصار ویسٹ انڈیز کے خلاف ون ڈے سیریز میں ان کی کارکردگی پر ہوگا۔ اگر وہ سلیکشن کمیٹی کو متاثر کرنے میں کامیاب ہوئے تو ان کی ٹیم میں شمولیت کے امکانات مزید بڑھ جائیں گے۔
حال ہی میں بابراعظم نے محمد رضوان اور نسیم شاہ کے ہمراہ پی سی بی کے چیئرمین محسن نقوی سے دوسرے ٹی ٹوئنٹی میچ کے دوران ملاقات بھی کی تھی۔
ایشیا کپ 2025 کے لیے حتمی اسکواڈ کا اعلان اگست کے دوسرے ہفتے میں متوقع ہے۔ ایونٹ کا آغاز 9 ستمبر کو گروپ بی کے ابتدائی مقابلے میں افغانستان اور ہانگ کانگ کے درمیان میچ سے ہوگا۔
ٹورنامنٹ میں کل آٹھ ٹیموں کو دو گروپوں میں تقسیم کیا گیا ہے۔ گروپ اے میں پاکستان، بھارت، یو اے ای اور عمان شامل ہیں، جبکہ گروپ بی میں سری لنکا، بنگلہ دیش، افغانستان اور ہانگ کانگ کی ٹیمیں موجود ہیں۔
