پشاور۔پی ٹی آئی کے رہنما اعظم سواتی کو پشاور ایئرپورٹ پر بیرونِ ملک روانگی سے روک دیا گیا، حالانکہ ایک روز قبل ہی عدالت میں ان کے نام کا کسی بھی اسٹاپ لسٹ میں شامل نہ ہونے کا یقین دلایا گیا تھا۔
پشاور ہائی کورٹ میں دائر درخواست میں مؤقف اختیار کیا گیا کہ سینیٹر اعظم خان سواتی کا نام پی این آئی سی لسٹ میں درج کر دیا گیا ہے، جس کے باعث ایف آئی اے نے انہیں پشاور ایئرپورٹ پر بیرونِ ملک جانے سے روک دیا۔
درخواست گزار کے وکیل کا کہنا ہے کہ اعظم سواتی کو عدالتی احکامات کے باوجود روکا گیا، جس پر آج پشاور ہائی کورٹ میں توہینِ عدالت کی درخواست جمع کرائی جا رہی ہے۔
یاد رہے کہ گزشتہ روز پشاور ہائی کورٹ نے سینیٹر اعظم سواتی کا نام ایگزٹ کنٹرول لسٹ (ای سی ایل) اور پاسپورٹ کنٹرول لسٹ (پی سی ایل) سے حذف کرنے کی درخواست منظور کرتے ہوئے کیس نمٹا دیا تھا۔
سماعت کے دوران اسسٹنٹ اٹارنی جنرل نے عدالت کو بتایا تھا کہ اعظم سواتی کا نام کسی بھی فہرست میں شامل نہیں اور انہیں سفر کی اجازت ہے، جبکہ ایف آئی اے کے نمائندے نے بھی عدالت کو یہ یقین دہانی کرائی تھی کہ درخواست گزار اب بیرونِ ملک جا سکتے ہیں۔
