نیو یارک ۔امریکا کے مشہور اور انسان دوست فیصلوں کی بدولت عالمی شہرت حاصل کرنے والے جج فرینک کیپریو طویل عرصے تک لبلبے کے کینسر سے نبردآزما رہنے کے بعد 88 برس کی عمر میں انتقال کر گئے۔ اہلِ خانہ کے مطابق وہ پُرسکون انداز میں اپنے عزیزوں کے درمیان دنیا سے رخصت ہوئے۔
جج کیپریو اپنی شفقت، ہمدردی اور انسانیت پر یقین رکھنے کی وجہ سے نہ صرف امریکا بلکہ دنیا بھر میں پہچانے جاتے تھے۔ ان کے عدالتی فیصلے بارہا سوشل میڈیا پر وائرل ہوئے، جن میں وہ ملزمان کے حالات و جذبات کو مدنظر رکھتے ہوئے ایسا انصاف کرتے تھے جس میں قانونی پہلو کے ساتھ اخلاقی اور انسانی زاویہ بھی جھلکتا تھا۔ اسی انداز نے انہیں “دنیا کے سب سے رحم دل جج” کا لقب دلوایا۔
انہیں سب سے زیادہ شہرت ان کے ٹی وی شو Caught in Providence سے ملی، جو 2000 میں نشر ہونا شروع ہوا اور چار مرتبہ ڈے ٹائم ایمی ایوارڈز کے لیے نامزد ہوا۔ عدالت میں ان کا رویہ ہمیشہ قانون کے ساتھ نرمی، ہمدردی اور سمجھ بوجھ کا عکاس رہا۔ وہ اکثر کہا کرتے تھے: “کبھی کبھی آپ کسی کی زندگی صرف یہ کہہ کر بدل سکتے ہیں کہ میں تم پر یقین رکھتا ہوں۔”
کیپریو نے تقریباً نصف صدی قبل پروویڈنس، رہوڈ آئی لینڈ میں بطور جج اپنی خدمات کا آغاز کیا۔ اس سے پہلے وہ امریکن گورنمنٹ پڑھاتے رہے اور قانون کی تعلیم حاصل کرنے کے بعد 1985 میں پروویڈنس میونسپل کورٹ کے جج تعینات ہوئے، جہاں وہ 2023 تک ذمہ داریاں نبھاتے رہے۔
دسمبر 2023 میں ایک ویڈیو پیغام میں انہوں نے عوام کو بتایا تھا کہ انہیں لبلبے کے کینسر کی تشخیص ہوئی ہے اور مداحوں سے دعاؤں کی اپیل کی۔ مئی 2024 میں آخری ریڈی ایشن مکمل ہونے پر انہوں نے خوشی کا اظہار کیا تھا، تاہم چند ماہ بعد طبیعت بگڑنے کے باعث دوبارہ اسپتال میں داخل ہونا پڑا۔
جج کیپریو کو نہ صرف ایک منصف مزاج جج بلکہ ایک شفیق شوہر، محبت کرنے والے والد، دادا، پردادا اور بہترین دوست کے طور پر بھی یاد کیا جا رہا ہے۔ اپنی زندگی اور فیصلوں کے ذریعے وہ دنیا بھر کے لوگوں کو رحم، درگزر اور نرمی اپنانے کی ترغیب دیتے رہے۔
ان کے انتقال پر دنیا بھر کے مداح اور پیروکار انہیں خراجِ عقیدت پیش کر رہے ہیں اور اس بات پر زور دے رہے ہیں کہ ان کے نقشِ قدم پر چلتے ہوئے معاشرے میں زیادہ انسانیت، شفقت اور محبت کو فروغ دینا چاہیے۔
