غزہ۔غزہ میں اسرائیلی جارحیت اور مظالم کے خلاف آسٹریلیا بھر میں لاکھوں افراد سڑکوں پر نکل آئے۔
سڈنی، میلبرن، پرتھ، ایڈیلیڈ، کینبرا، ہوبارٹ اور برسبین سمیت 40 سے زائد شہروں میں بڑے پیمانے پر ریلیاں اور احتجاجی مظاہرے ہوئے جن میں 3 لاکھ سے زیادہ لوگ شریک ہوئے۔
مظاہرین نے فلسطینی عوام کے حق میں نعرے لگاتے ہوئے مطالبہ کیا کہ غزہ میں جاری اسرائیلی نسل کشی اور مسلط کردہ قحط فوری طور پر روکا جائے۔ انہوں نے آسٹریلوی حکومت پر دباؤ ڈالا کہ اسرائیل کے خلاف فوری اقتصادی اور سفارتی پابندیاں عائد کی جائیں۔
اسی دوران دنیا کے مختلف ممالک میں بھی فلسطین کے حق میں احتجاجی مظاہرے منعقد ہوئے۔ برطانیہ میں مظاہرین نے ایک بینک کے اندر دھرنا دے کر اسرائیل سے مالی تعلقات ختم کرنے کا مطالبہ کیا، جبکہ بیلجیئم کے دارالحکومت برسلز میں ہزاروں افراد فلسطینیوں سے یکجہتی کے لیے جمع ہوئے۔
فن لینڈ میں انسانی زنجیر بنا کر احتجاج کیا گیا اور جنوبی کوریا میں اسرائیلی سفارتخانے کے باہر “فری فلسطین” کے نعرے لگائے گئے۔
خود اسرائیل کے اندر بھی نیتن یاہو حکومت کے خلاف آوازیں بلند ہوئیں۔ تل ابیب میں ہزاروں افراد فوجی ہیڈکوارٹر کے سامنے جمع ہو کر جنگ بندی کا مطالبہ کرتے رہے۔
