صدرِ پاکستان آصف علی زرداری نے یومِ فضائیہ کے موقع پر پوری قوم کی جانب سے پاک فضائیہ کے شہداء، غازیوں اور تمام افسران و جوانوں کو زبردست خراجِ عقیدت پیش کیا۔
اپنے خصوصی پیغام میں صدر نے کہا کہ قوم ان شہداء اور غازیوں کو سلام پیش کرتی ہے جنہوں نے مادرِ وطن کے دفاع کے لیے اپنی جانوں کی قربانی دی اور بے مثال جرات و بہادری کا مظاہرہ کیا۔
صدر زرداری نے 1965 کی جنگ کا ذکر کرتے ہوئے کہا کہ پاک فضائیہ نے اس یادگار معرکے میں ایسی شجاعت اور دلیری کی تاریخ رقم کی جو ہمیشہ یاد رکھی جائے گی۔ اُن کا کہنا تھا کہ فضائیہ نے نہ صرف جنگ کے دوران بلکہ ہر کڑے وقت میں پیشہ ورانہ مہارت، بلند حوصلے اور شجاعت سے اپنے فرائض انجام دیے۔
انہوں نے مزید کہا کہ پاک فضائیہ نے ’’معرکۂ حق، بنیان المرصوص‘‘ میں فیصلہ کن کردار ادا کر کے دشمن کو ہر محاذ پر شکست سے دوچار کیا، جو پوری قوم کے لیے فخر کا باعث ہے۔
صدر مملکت کا کہنا تھا کہ پاک فضائیہ کی غیر معمولی پیشہ ورانہ صلاحیتوں نے دنیا کو حیران کیا ہے اور اس کی جدید قوت ملکی دفاع کی مضبوط ضمانت ہے۔ اُنہوں نے کہا کہ فضائیہ نے ہمیشہ پاکستان کی فضائی حدود اور قومی وقار کا بھرپور تحفظ کیا ہے، جس پر قوم بجا طور پر نازاں ہے۔
