مسلم لیگ (ن) کے مرکزی رہنما رانا ثناء اللہ نے کہا ہے کہ بانی پی ٹی آئی ہی وہ واحد شخصیت ہیں جنہوں نے ملکی سیاست میں اوئے توئے اور گالی گلوچ کی روایت ڈالی، جبکہ ان کی جماعت کا موجودہ رویہ سیاسی نہیں بلکہ انتشار اور بدامنی کو ہوا دینے والا ہے۔
میڈیا سے گفتگو میں ان کا کہنا تھا کہ تحریک انصاف کا بائیکاٹ دراصل فرار کی راہ ہے، کیونکہ ایک طرف وہ الیکشن کمیشن سے کاغذات وصول کرکے تمام مراحل مکمل کرتے ہیں اور دوسری جانب عدالتوں کا رخ کرتے ہیں۔
رانا ثناء اللہ نے کہا کہ بانی پی ٹی آئی کو اپنے ہی لوگوں پر اعتماد نہیں، ان کے کئی اراکین ووٹ ڈالنے کے خواہشمند تھے لیکن انہیں ہدایت دی گئی کہ اپنی ہی پارٹی کو ووٹ نہ دیں۔ ان کا مزید کہنا تھا کہ جب ملک بیرونی خطرات سے دوچار تھا تو بانی پی ٹی آئی کسی بات کو سننے کے لیے تیار نہیں تھے۔
انہوں نے کہا کہ حق کے معرکے میں کامیابی سیاسی و عسکری قیادت کے باہمی اتفاق سے ممکن ہوئی، جو پاکستان کی تاریخ میں پہلی مرتبہ دیکھنے کو ملا۔
مزید کہا کہ وزیر اعظم شہباز شریف نے “میثاقِ استحکام پاکستان” کا پیغام دے کر قومی ہم آہنگی کو فروغ دیا ہے، لیکن بانی پی ٹی آئی اور ان کے حمایتی فتنہ، افراتفری اور انارکی چاہتے ہیں، ان کا طرزِ عمل کسی صورت سیاسی نہیں۔ رانا ثناء اللہ کے مطابق خیبرپختونخوا اور بلوچستان میں ہونے والی دہشت گردانہ کارروائیوں کے پیچھے بھی وہی عناصر کارفرما ہیں جو پاکستان کو کمزور دیکھنے کی خواہش رکھتے ہیں۔
