اسلام آباد ۔یاماہا موٹر پاکستان نے موٹر سائیکل شائقین کے لیے ایک نئی اور منفردایکسچینج اسکیم متعارف کرادی ہے۔ اس آفر کے تحت گاہک اپنی پرانی موٹر سائیکل منتخب ڈیلرشپس پر جمع کرا کے بالکل نئی یاماہا موٹر سائیکل حاصل کرسکیں گے۔
کمپنی کے مطابق اس پروگرام کا مقصد صارفین کو سہولت فراہم کرنا ہے تاکہ وہ خریدار تلاش کرنے، قیمت پر بحث کرنے اور نجی سیل کے غیر یقینی عمل سے بچ سکیں۔ اس اسکیم کے ذریعے بائیک مالکان کو ایک محفوظ اور آسان طریقے سے نئی موٹر سائیکل میں اپ گریڈ کرنے کا موقع میسر آئے گا۔
یاماہا کا کہنا ہے کہ یہ آفر خاص طور پر ان صارفین کے لیے متعارف کرائی گئی ہے جو زیادہ پائیداری، جدید اسٹائل اور آرام دہ سواری کے خواہاں ہیں۔ تاہم کمپنی نے واضح کیا ہے کہ یہ سہولت صرف چند مخصوص ڈیلرشپس پر دستیاب ہوگی، اس لیے خریداروں کو مشورہ دیا گیا ہے کہ وزٹ سے قبل قریبی ڈیلرشپ سے اسکیم کی دستیابی کی تصدیق ضرور کریں۔
یہ بات قابل ذکر ہے کہ اسی ہفتے یاماہا موٹر پاکستان (پرائیویٹ) لمیٹڈ نے مقامی طور پر موٹر سائیکل کی تیاری روکنے کا بھی اعلان کیا تھا۔ کمپنی نے اپنی نئی بزنس پالیسی کے تحت یہ فیصلہ کیا اور باضابطہ نوٹیفکیشن میں اپنے صارفین کا شکریہ ادا کیا کہ انہوں نے برسوں تک یاماہا پر اعتماد اور وفاداری برقرار رکھی۔
