اسلام آباد: قومی ایئر لائن (پی آئی اے) کو برطانیہ کے لیے تھرڈ کنٹری آپریٹر (TCO) کی باضابطہ منظوری مل گئی ہے جس کے بعد پی آئی اے آئندہ ماہ سے براہ راست فضائی آپریشن شروع کرے گا۔
پہلے مرحلے میں مانچسٹر کے لیے پروازیں چلائی جائیں گی، جس کے بعد برمنگھم اور لندن کو بھی نیٹ ورک میں شامل کیا جائے گا۔ برطانوی محکمہ ٹرانسپورٹ نے گزشتہ روز پی آئی اے کو اس حوالے سے باضابطہ طور پر آگاہ کیا۔
پی آئی اے کو جامع منظوری دی گئی ہے جس کے تحت ایئر لائن مسافروں کے ساتھ ساتھ کارگو کی بھی براہ راست ترسیل کر سکے گی۔ اس کے علاوہ برطانوی محکمہ ٹرانسپورٹ نے پی آئی اے کو پانچ سال کے لیے سیکیورٹی اور کارگو کے حوالے سے ACC3 سرٹیفکیٹ بھی جاری کیا ہے۔
بین الاقوامی ہوابازی کے اداروں کی جانب سے جاری کردہ یہ سرٹیفکیٹس پی آئی اے کے فضائی آپریشنز اور سیفٹی پر مکمل اعتماد کی عکاسی کرتے ہیں۔
سی ای او پی آئی اے نے وزیر اعظم پاکستان، نائب وزیر اعظم، وزیر دفاع، وزارت دفاع، سول ایوی ایشن اور دیگر متعلقہ اداروں کی سرپرستی پر شکریہ ادا کیا۔ انہوں نے پی آئی اے کی ٹیم کو بھی خراجِ تحسین پیش کیا جنہوں نے گزشتہ پانچ سالوں میں متعدد آڈٹس کا سامنا کیا اور کامیابی حاصل کی۔
