اسلام آباد ۔ایشیائی مارکیٹ میں جمعرات کو خام تیل کی قیمتوں میں کمی ریکارڈ کی گئی۔ کاروباری سرگرمیوں کے دوران برینٹ کروڈ فیوچرز 26 سینٹ یعنی 0.4 فیصد کمی کے ساتھ 69.05 ڈالر فی بیرل پر آ گئے۔ اسی طرح امریکی ویسٹ ٹیکساس انٹرمیڈیٹ (WTI) فیوچرز بھی 27 سینٹ یا 0.4 فیصد سستا ہو کر 64.72 ڈالر فی بیرل پر بند ہوا۔
رپورٹ کے مطابق ایک روز قبل دونوں بینچ مارکس میں 2.5 فیصد کا نمایاں اضافہ دیکھا گیا تھا جو یکم اگست کے بعد بلند ترین سطح تھی۔ قیمتوں میں یہ اضافہ امریکی تیل کے ذخائر میں غیر متوقع کمی اور یوکرین کی جانب سے روسی توانائی کے ڈھانچے پر ممکنہ حملوں کے خدشات کے باعث سامنے آیا تھا جس نے سپلائی میں خلل کا خطرہ پیدا کر دیا تھا۔
