دبئی: ایشیا کپ کے سپر فور مرحلے کے آخری میچ میں بھارت نے سری لنکا کو اعصاب شکن مقابلے کے بعد سپر اوور میں شکست دے کر کامیابی سمیٹ لی۔
203 رنز کے ہدف کے تعاقب میں سری لنکن بیٹنگ لائن نے بھرپور مزاحمت کی اور مقررہ اوورز میں 5 وکٹوں کے نقصان پر 202 رنز بنا کر میچ برابر کردیا۔ تاہم سپر اوور میں سری لنکن بیٹسمین صرف 3 رنز ہی جوڑ سکے، جو بھارت نے پہلی ہی گیند پر حاصل کر لیا۔
سری لنکا کی جانب سے پتھم نسانکا نے شاندار بلے بازی کا مظاہرہ کرتے ہوئے 107 رنز کی یادگار اننگز کھیلی جبکہ کوشل پریرا نے 58 رنز جوڑے۔ دیگر کھلاڑیوں میں کپتان چریتھ اسالانکا 5، کمنڈو مینڈس 3 اور کوشل مینڈس بغیر کوئی رن بنائے آؤٹ ہوئے۔ داسن شناکا 22 اور جنتھ لیاناگے 2 رنز کے ساتھ ناٹ آؤٹ رہے۔
بھارت کی جانب سے ہاردک پانڈیا، کلدیپ یادو، ورون چکرورتی، ارشدیپ سنگھ اور ہرشت رانا نے ایک ایک کھلاڑی کو پویلین بھیجا۔
اس سے قبل بھارت نے سری لنکا کی دعوت پر بیٹنگ کرتے ہوئے مقررہ اوورز میں 5 وکٹوں پر 202 رنز بنائے۔ ابھیشیک شرما 61 رنز کے ساتھ نمایاں بلے باز رہے جبکہ سنجو سیمسن نے 39 رنز اسکور کیے۔ کپتان سوریا کمار یادو 12، شبھمن گل 4 اور ہاردک پانڈیا صرف 2 رنز پر آؤٹ ہوئے۔
تلک ورما اور اکشر پٹیل بالترتیب 49 اور 21 رنز کے ساتھ ناٹ آؤٹ پویلین لوٹے۔ سری لنکا کے پانچوں باؤلرز، بشمول کپتان اسالانکا، مہیش ٹھیکشانا، دشمانتا چمیرا، ونندو ہسارنگا اور داسن شناکا نے ایک ایک وکٹ حاصل کی۔
