اسلام آباد: پاکستان سمیت اردن، متحدہ عرب امارات، انڈونیشیا، ترکیہ، سعودی عرب، قطر اور مصر نے امریکی صدر ڈونلڈ ٹرمپ کے مجوزہ امن منصوبے کی حمایت کر دی ہے جس میں غزہ میں جنگ بندی، انسانی امداد کی ترسیل اور جبری بے دخلی کی روک تھام جیسے اقدامات شامل ہیں۔
مشترکہ اعلامیے میں کہا گیا ہے کہ مسلم ممالک نے صدر ٹرمپ کی اس یقین دہانی کا خیرمقدم کیا ہے کہ مغربی کنارے کا انضمام نہیں ہونے دیا جائے گا اور فلسطینی عوام کے تحفظ کو یقینی بنایا جائے گا۔
اعلامیے کے مطابق مسلم ممالک امریکا اور دیگر عالمی فریقین کے ساتھ مثبت مذاکرات کے لیے تیار ہیں تاکہ معاہدے کو حتمی شکل دی جا سکے۔ اس منصوبے میں غزہ کی تعمیر نو، انسانی امداد کی بلا تعطل فراہمی، مغویوں کی رہائی، اسرائیلی افواج کا مکمل انخلا اور دو ریاستی حل کے تحت آزاد فلسطینی ریاست کے قیام کے عزم پر زور دیا گیا ہے۔
وزرائے خارجہ نے کہا کہ یہ اقدامات بین الاقوامی قوانین کے مطابق ہیں اور خطے میں دیرپا امن، استحکام اور سلامتی کے لیے ناگزیر ہیں۔
