ہالی ووڈ کی معروف آسکر ایوارڈ یافتہ اداکارہ نکول کڈمین اور گریمی ایوارڈ یافتہ کنٹری گلوکار کیتھ اربن نے تقریباً بیس سالہ ازدواجی رشتے کے بعد راہیں جدا کر لی ہیں۔ اس اعلان نے فنی برادری اور مداحوں کو گہرے صدمے سے دوچار کر دیا ہے۔
2006 میں شروع ہونے والی یہ شادی اب اختتام کو پہنچی۔ ذرائع کے مطابق دونوں کئی ماہ سے علیحدہ رہ رہے تھے، جبکہ رپورٹس میں کہا گیا ہے کہ نکول کڈمین علیحدگی کے حق میں نہیں تھیں۔
ان کے رشتے میں خوشی اور آزمائش کے کئی مراحل آئے۔ شادی کے صرف چند ماہ بعد ہی اربن کو نشے اور شراب نوشی کی عادت کے باعث بحالی مرکز جانا پڑا، جہاں کڈمین اور قریبی دوستوں کی مدد نے انہیں سنبھلنے میں اہم کردار ادا کیا۔
یہ جوڑا تقریباً ہر بڑے ہالی ووڈ ایونٹ اور ریڈ کارپٹ پر ایک ساتھ دکھائی دیتا تھا، جو ان کے تعلق کی مضبوطی کا مظہر سمجھا جاتا تھا۔ دونوں کی دو بیٹیاں بھی ہیں۔
نکول کڈمین کی یہ دوسری شادی تھی۔ اس سے قبل وہ 1990 سے 2001 تک مشہور اداکار ٹام کروز کے ساتھ رشتہ ازدواج میں منسلک رہیں۔
کڈمین اور اربن کی علیحدگی نے ہالی ووڈ میں ایک اور طویل المدتی شادی کے اختتام کی مثال قائم کر دی ہے، جس پر مداحوں اور فنی حلقوں نے افسوس کا اظہار کیا ہے۔
