روم/برلن/بارسلونا/برسلز: یورپ کے مختلف شہروں میں اسرائیلی افواج کی جانب سے ’’گلوبل صمود فلوٹیلا‘‘ پر حملے کے خلاف بڑے پیمانے پر احتجاجی مظاہرے کیے گئے، جن میں فلسطین کے حامی کارکنان، طلبہ اور یونینز کے نمائندوں نے بھرپور شرکت کی۔
ترک خبر رساں ادارے انادولو کے مطابق اٹلی کے دارالحکومت روم میں سیکڑوں افراد نے ٹرمنی اسٹیشن کے سامنے پیاچا دی چیونکوینتو پر جمع ہو کر اسرائیل مخالف نعرے لگائے۔ مظاہرین نے فلسطینی عوام سے اظہارِ یکجہتی کرتے ہوئے امدادی قافلے پر حملے کو عالمی قوانین کی کھلی خلاف ورزی قرار دیا۔
اسی طرح اسپین کے شہر بارسلونا میں بھی اسرائیلی قونصلیٹ کے باہر سینکڑوں افراد نے احتجاج کیا اور غزہ کے عوام کی حمایت کا اعلان کیا۔ جرمنی کے شہر برلن میں درجنوں مظاہرین مرکزی ریلوے اسٹیشن کے باہر جمع ہوئے اور اسرائیلی کارروائی کے خلاف نعرے بازی کی۔
بیلجیم کے دارالحکومت برسلز میں بھی احتجاجی ریلی نکالی گئی جو پلاس دی لا بورس سے شروع ہو کر بیلجین وزارتِ خارجہ تک پہنچی۔ مظاہرین کا کہنا تھا کہ اسرائیلی حملہ انسانی ہمدردی کی کوششوں پر براہِ راست حملہ ہے اور عالمی برادری کو فوری طور پر فلسطینی عوام کی مدد کے لیے مؤثر اقدامات کرنے چاہئیں۔
