ویسٹ انڈیز کے سابق آل راؤنڈر برنارڈ جولین طویل عرصے بعد دنیا سے رخصت ہو گئے۔ وہ 75 برس کے تھے اور 1975 کے پہلے ون ڈے ورلڈ کپ کی فاتح ٹیم کے نمایاں کھلاڑیوں میں شمار ہوتے تھے۔
برنارڈ جولین نے اپنے کیریئر میں ویسٹ انڈیز کی جانب سے 24 ٹیسٹ کھیلے جن میں 866 رنز بنائے اور 50 وکٹیں حاصل کیں، جب کہ ون ڈے کرکٹ میں بھی 18 کھلاڑیوں کو آؤٹ کیا۔ وہ بائیں ہاتھ کے ایسے سوئنگ بولر تھے جن کی گیند دونوں طرف مؤثر انداز میں حرکت کرتی تھی۔
1975 ورلڈ کپ میں ان کی شاندار کارکردگی نے ویسٹ انڈیز کو ٹائٹل جیتنے میں اہم کردار ادا کیا۔ انہوں نے سری لنکا کے خلاف 20 رنز کے عوض 4 وکٹیں، نیوزی لینڈ کے خلاف 27 رنز دے کر 4 شکار کیے اور فائنل میں آسٹریلیا کے دو کھلاڑیوں کو پویلین بھیجا۔ اسی ٹورنامنٹ میں ان کی ناقابل شکست 26 رنز کی اننگز نے بھی ٹیم کو پہلی عالمی فتح دلانے میں مدد فراہم کی۔
تاہم ان کا بین الاقوامی کیریئر اس وقت اختتام پذیر ہوا جب انہوں نے 1982–83 اور 1983–84 میں جنوبی افریقہ کے متنازع دوروں میں شرکت کی، اس دور میں ملک نسلی امتیاز کے باعث عالمی بائیکاٹ کا سامنا کر رہا تھا۔
کرکٹ ویسٹ انڈیز نے ان کے انتقال پر دکھ کا اظہار کرتے ہوئے کہا کہ برنارڈ جولین کی خدمات ہماری کرکٹ اور خطے کی تاریخ کا اہم حصہ ہیں۔ بورڈ نے مزید کہا کہ وقت آگیا ہے کہ اس باب کو تنقید کے بجائے فہم اور قبولیت کے جذبے سے دیکھا جائے۔
ویسٹ انڈیز کرکٹ نے برنارڈ جولین کے اہل خانہ اور ساتھیوں سے ہمدردی کا اظہار کیا اور کہا کہ ان کی یاد ہمیشہ قائم رہے گی۔
