پنجاب میں قومی اسمبلی کی 5 اور صوبائی اسمبلی کی 6 حلقوں پر ضمنی انتخابات کے نتائج آنے کا سلسلہ جاری ہے۔
لاہور، فیصل آباد، ساہیوال، ڈیرہ غازی خان، سرگودھا، میانوالی اور مظفرگڑھ میں پولنگ صبح 8 بجے شروع ہوئی اور شام 5 بجے تک جاری رہی۔ ووٹوں کی گنتی کے بعد ابتدائی نتائج سامنے آنے لگے ہیں، جن میں مسلم لیگ (ن) کے امیدواروں کو زیادہ تر حلقوں میں برتری حاصل ہے۔
قومی اسمبلی کی نشستوں میں این اے 96 فیصل آباد 2 کے 345 پولنگ اسٹیشنز میں سے 36 کے غیر حتمی غیر سرکاری نتائج کے مطابق ن لیگ کے محمد بلال بدر 10,390 ووٹ لے کر پہلے نمبر پر ہیں، جبکہ آزاد امیدوار نواب شیر وسیر 2,408 ووٹوں کے ساتھ دوسرے نمبر پر ہیں۔
این اے 104 فیصل آباد 10 کے 375 پولنگ اسٹیشنز میں سے 66 کے غیر سرکاری نتائج کے تحت ن لیگ کے دانیال احمد 7,632 ووٹ لے کر آگے ہیں، جبکہ آزاد امیدوار رانا عدنان جاوید 3,822 ووٹوں کے ساتھ دوسرے نمبر پر ہیں۔
این اے 18 ہری پور میں 62 پولنگ اسٹیشنز کے غیر سرکاری غیر حتمی نتائج کے مطابق ن لیگ کے امیدوار آگے ہیں۔ این اے 129 لاہور 13 کے 334 پولنگ اسٹیشنز میں سے 46 کے ابتدائی نتائج میں حافظ میاں محمد نعمان 4,296 ووٹوں کے ساتھ پہلے نمبر پر ہیں جبکہ آزاد امیدوار ارسلان احمد 2,848 ووٹ لے کر دوسرے نمبر پر ہیں۔
این اے 143 ساہیوال 3 میں ن لیگ کے محمد طفیل 13,150 ووٹ لے کر آگے ہیں، جبکہ آزاد امیدوار ضرار اکبر چوہدری 929 ووٹوں کے ساتھ دوسرے نمبر پر ہیں۔ این اے 185 ڈیرہ غازی خان 2 میں ن لیگ کے محمود قادر خان 17,840 ووٹ لے کر سب سے آگے ہیں اور پیپلز پارٹی کے دوست محمد کھوسہ 6,897 ووٹوں کے ساتھ دوسرے نمبر پر ہیں۔
صوبائی اسمبلی کی نشستوں میں بھی ن لیگ کے امیدوار برتری پر ہیں۔ پی پی 73 سرگودھا میں میاں سلطان علی رانجھا 8,659 ووٹ لے کر آگے ہیں، جبکہ آزاد امیدوار محمد حارث 2,028 ووٹوں کے ساتھ دوسرے نمبر پر ہیں۔
پی پی 87 میانوالی میں علی حیدر نور خان نیازی 5,425 ووٹ لے کر پہلے نمبر پر ہیں، اور آزاد امیدوار محمد ایاز خان نیازی 525 ووٹوں کے ساتھ دوسرے نمبر پر ہیں۔
پی پی 98 فیصل آباد 1 کے 171 پولنگ اسٹیشنز میں سے 7 کے غیر سرکاری نتائج کے مطابق ن لیگ کے آزاد علی تبسم 1,819 ووٹ لے کر سب سے آگے ہیں، جبکہ محمد اجمل 579 ووٹ کے ساتھ دوسرے نمبر پر ہیں۔
پی پی 115 فیصل آباد 18 میں ن لیگ کے محمد طاہر پرویز 4,248 ووٹ لے کر آگے ہیں، اور آزاد امیدوار محمد اصغر 241 ووٹوں کے ساتھ دوسرے نمبر پر ہیں۔ پی پی 116 فیصل آباد 19 میں احمد شہریار 10,195 ووٹ لے کر پہلے نمبر پر ہیں، اور ملک اصغر علی قیصر 1,783 ووٹ کے ساتھ دوسرے نمبر پر ہیں۔
پی پی 203 ساہیوال 6 کے ابتدائی نتائج میں ن لیگ کے محمد حنیف 8,891 ووٹ لے کر آگے ہیں، جبکہ آزاد امیدوار فلک شیر 1,323 ووٹوں کے ساتھ دوسرے نمبر پر ہیں۔
پی پی 269 مظفرگڑھ 2 میں پیپلز پارٹی کے میاں علمدار عباس قریشی 10,511 ووٹ لے کر آگے ہیں، اور آزاد امیدوار محمد اقبال خان پتافی 6,456 ووٹوں کے ساتھ دوسرے نمبر پر ہیں۔
ابتدائی غیر حتمی نتائج کے مطابق مسلم لیگ (ن) نے زیادہ تر قومی اور صوبائی نشستوں میں برتری حاصل کر لی ہے، جبکہ پیپلز پارٹی نے صرف مظفرگڑھ کی ایک صوبائی نشست میں آگے رہنے کا امکان پیدا کیا ہے۔ ووٹوں کی حتمی گنتی کے بعد حتمی نتائج سامنے آئیں گے۔
قبل ازیں پولنگ کا عمل مکمل ہو گیا اور قومی اسمبلی کے 6 اور پنجاب اسمبلی کے 7 حلقوں میں ووٹوں کی گنتی جاری ہے۔ ضمنی انتخابات کے دوران مجموعی طور پر 2 ہزار 792 پولنگ اسٹیشنز میں سے 408 کو انتہائی حساس اور 1,032 کو حساس قرار دیا گیا ہے۔
