دلجیت دوسانجھ کا کنسرٹ: پاکستانی سپر سٹار ہانیہ عامر کی پذیرائی
انڈین پاپ گلوکار مختلف ممالک میں میوزک شو کر رہے ہیں، لندن کے او ٹو ایرینا میں کنسرٹ میں انہوں نے پاکستانی اداکارہ ہانیہ عامر کو سٹیج پر آنے کی دعوت دی۔
دل لیومیناٹی ٹوور کے تحت برطانیہ کے شہر برمنگھن میں ہونے والے کنسرٹ میں دلجیت دوسانجھ نے برطانوی گلوکار ایڈ شیرین کے ساتھ مل کر پرفارم کیا جبکہ لندن میں ہونے والے کنسرٹ میں انہوں نے بالی وڈ کے مشہور ریپر بادشاہ کے ساتھ پرفارم کیا۔
برطانیہ میں ہونے والے شو میں پاکستانی اداکارہ ہانیہ عامر بھی موجود تھیں جو سٹیج کے قریب کھڑی کنسرٹ کو بھرپور انجوائے کر رہی تھیں۔ اس شو کی متعدد تصاویر اور ویڈیوز سوشل میڈیا پر شیئر کی گئی ہیں جن میں سے ایک میں ہانیہ عامر بھی سٹیج پر نظر آ رہی ہیں۔
دلجیت دوسانجھ کا کنسرٹ:
ایک ویڈیو میں دلجیت دوسانجھ ہانیہ عامر کو سپر سٹار کہتے ہوئے سٹیج پر آنے کی دعوت دیتے نظر آئے جبکہ شائقین بھی اپنے نعروں سے پاکستانی اداکارہ کی حوصلہ افزائی کر رہے ہیں۔
دلجیت اور شائقین کے اصرار پر ہانیہ عامر سٹیج پر جاتی ہیں اور انڈین اداکار اپنا مشہور گانا لو گاتے ہیں جس پر ہانیہ تالیاں بجا رہی ہیں۔
دلجیت نے اپنا گانا ختم کیا تو پاکستانی اداکارہ نے انڈین گلوکار اور کنسرٹ میں موجود شائقین کا شکریہ ادا کیا۔
اس موقع پر دلجیت دوسانجھ نے ہانیہ سے کہا کہ میں آپ کا اور آپ کے کام کا فین ہوں۔ آپ بہت اچھا کام کر رہی ہیں۔ آپ آئیں آپ کا شکریہ۔
پاکستانی اداکارہ ہانیہ بھی انڈین پاپ گلوکار دلجیت دوسانجھ کی بہت بڑی فین ہیں اور اکثر ان کی گانے گنگناتے ہوئے اپنی ویڈیو بھی سوشل میڈیا پر شیئر کر چکی ہیں
ہانیہ عامر نے بھی دلجیت دوسانجھ کے ساتھ ویڈیو انسٹاگرام سٹوریز پر شیئر کرنے کے ساتھ ساتھ دلجیت دوسانجھ کو بھی ٹیگ کی
سوشل میڈیا پر صارفین کی طرف سے بھی ویڈیو کو خوب سراہا جا رہا ہے
