قومی کرکٹ ٹیم کے اوپنر احمد شہزاد نے انگلینڈ کے خلاف ملتان ٹیسٹ میں ہوم گرائونڈ پر بدترین شکست کے بعد کھلاڑیوں کو بالی ووڈ فلم لگان سے حوصلہ لینے کا مشورہ دیا۔
کرکٹر احمد شہزاد نے سماجی رابطے کی سائٹ فیس بک پر ویڈیو شیئر کرتے ہوئے پاکستانی کرکٹ ٹیم کے تمام کھلاڑیوں کو آڑے ہاتھوں لیا، انہوں نے کہا کہ انگلینڈ کے خلاف ملتان ٹیسٹ میں بیٹنگ ٹریک بنا کر پاکستان نے اپنے شکست خوردہ ہونے کا ثبوت دیا ہے۔
اپنی بات چیت کے دوران انہوں نے پاکستان کرکٹ بورڈ اور کھلاڑیوں کو خوب تنقید کا نشانہ بنایا اور کہا کہ پاکستانی کرکٹ ٹیم کے کھلاڑیوں کو چاہئے کہ وہ اپنے اندر کھیل کا جذبہ پیدا کرنے کے لئے بالی وڈ کی معروف فلم لگان دیکھیں کیونکہ پاکستان کرکٹ بورڈ نے اپنی جیب سے پیسے خرچ کرنے ہوتے ہیں، آپ لوگوں کو تو ملک کی عزت کا کوئی خیال ہی نہیں ۔
احمد شہزاد نے گفتگو کرتے ہوئے مزید کہا کہ اب لگان فلم کچرا جیسے بولر ہی مل جائیں جس نے انگلیڈ کے کھلاڑیوں کو آئوٹ کیا تھا یا اب وہ بھی نہیں مل رہا کیونکہ ہمارے اسپنرز کو چائے پانی سے ہی فرصت نہیں مل رہی۔پاکستانی ٹیم کو ہوم گرائونڈ پر جو ٹیم بھی آ رہی ہے وہ مسلسل کسی مندر کے گھنٹے کی طرح بجا کر جا رہی ہے اور ہم صرف منہ دیکھ رہے ہیں۔
بنگلا دیش کے خلاف پہلی بار تاریخی شکست کھانے کے بعد اب ہمارے کھلاڑی انگلینڈ کی کرکٹ ٹیم کے خلاف بھی گھٹیا اور بری پرفارمنس کا مظاہرہ کر رہے ہیں۔
انہوں نے کہا کہ پاکستان کرکٹ ٹیم میں اب بڑی تبدیلیاں ناگزیر ہو چکی ہیں کیونکہ سوشل میڈیا کی ذریعے قوم کو اب مزید بیوقوف نہیں بنایا جا سکتا۔ پاکستان کرکٹ بورڈ کے چیئرمین اور پاکستان کرکٹ ٹیم کے سلیکٹرز کو چاہئے کہ وہ اب نوجوان کھلاڑیوں کو کھیلنے کا موقع دیں۔
