بالی ووڈ کے معروف ایکشن ہیرو اجے دیوگن کے مطابق وہ سنگھم اگین کی شوٹنگ کے دوران ایک ایکشن سین فلماتے ہوئے حادثے کا شکار ہو گئے تھے۔
اجے دیوگن نے حال ہی میں ریئلٹی شو بگ باس میں شرکت کی، جہاں سلمان خان نے انکشاف کیا کہ ایکشن فلم سنگھم اگین کی شوٹنگ کے دوران اجے ایک ایکشن سین فلمانے کے دوران حادثے کا شکار ہوئے تھے۔
شو کے دوران سلمان خان نے بتایا کہ اس ایکشن سین میں ایک کردار سے لڑائی کے دوران غلط ٹائمنگ کے باعث لکڑی اجے کی آنکھ میں جا لگی، جس کے باعث وہ تقریبا 3 ماہ کیلئے بینائی سے محروم ہو گئے تھے۔ سلمان کا مزید کہنا تھا کہ ایکشن فلم کی شوٹنگ میں ایسا ہو جاتا ہے جبکہ آج کل کے اداکاروں کو تو بہت سی سہولیات دستیاب ہیں جو ماضی میں نہیں تھیں۔
اجے کے مطابق وہ روہت شیٹھی کی ایکشن فلم سنگھم اگین میں اتنی بری طرح زخمی ہوئے کہ انہیں آنکھ کی سرجری کروانا پڑی اور کئی دنوں تک تکلیف میں مبتلا رہنا پڑا تاہم اب وہ پہلے سے بہتر ہیں اور جلد دوبارہ اداکاری کے جوہر دکھائیں گے۔
ایکشن فلم سنگھم اگین سپر ہٹ فرنچائز کی تیسری قسط ہے۔ 2011میں ریلیز ہونے والی سنگھم میں کاجل اگروال اور پرکاش راج نے مرکزی کردار نبھائے تھے، اس کے بعد سنگھم ریٹرنز 2014میں ریلیز ہوئی تھی، دونوں فلموں کو باکس آفس پر کامیاب قرار دیا گیا، اس اس کا تیسرا حصہ دیوالی پر ریلیز ہو گا۔
روہت شیٹھی کی ہدایت کاری میں بننے والی ایکشن فلم سنگھم اگین میں اجے باجی رائو سنگھم کے کردار میں ایک بار پھر نظر آئیں گے۔ اس فلم میں سلمان بھی کیمیو کریں گے جبکہ دیگر کرداروں میں رنویر سنگھ، اکشے کمار، کرینہ کپور، دیپیکا پڈوکون، ٹائیگر شروف اور ارجن کپور شامل ہیں۔
