پاکستان اور آسٹریلیا کے مابین پہلا ون ڈے میلبرن کرکٹ گرائونڈ میں کھیلا گیا، آسٹریلوی کپتان نے ٹاس جیت کر پاکستان کو پہلے بیٹنگ کرنے کی دعوت دی۔
آسٹریلیا پہلا ون ڈے میچ جیتنے میں کامیاب رہا، سنسنی خیز مقابلے کے بعد پاکستان کو 2 وکٹوں سے شکست دیدی۔
پاکستانی کرکٹ ٹیم پہلے نے بیٹنگ کرتے ہوئے 46.4 اوورز میں 203 رنز بنائے، شاہینوں نے ایک بار پھر بیٹنگ میں فلاپ شو کا مظاہرہ کیا، کوئی بھی بیٹر خاطر خواہ کارکردگی دکھانے میں کامیاب نہ ہو سکا۔
میچ میں پاکستان کی جانب سے اننگز کا آغاز صائم ایوب اور عبداللہ شفیق نے کیا مگر دونوں ٹیم کو اچھا آغاز فراہم کرنے میں کامیاب نہ ہو سکے، اوپنر بلے باز صائم صرف ایک رن بنا کر مچل سٹارک کے ہاتھوں کلین بولڈ ہوئے جبکہ عبداللہ شفیق کو بھی سٹارک نے 12رنز پر واپس پویلین بھیج دیا۔
سابق کپتان بابر اعظم نے بیٹنگ کے دوران کچھ مزاحمت کی تاہم وہ ایڈم زمپا کے ہاتھوں 37کے انفرادی سکور پر آئوٹ ہو گئے، کامران غلام صرف 5 رنز بنا کر پیٹ کمنز کا شکار بنے۔
سلمان علی آغا کو سین نے 12جبکہ اور پاکستانی کپتان محمد رضوان کو مارنوس نے 44 رنز پر شکار کیا، شاہین شاہ آفریدی 24رنز بنا کر مچل سٹارک کا نشانہ بنے۔
آٹھویں وکٹ 175رنز پر گری جب ڈیبیو کرنے والے عرفان خان نیازی 22رنز بنا کر رن آئوٹ ہو گئے۔
9 ویں وکٹ 183 اور دسویں وکٹ 203 رنز پر گر گئی، حارث بغیر کوئی رن بنائے جبکہ نسیم شاہ 40 رنز کی ایک شاندار اننگز کھیل کر پویلین واپس لوٹے۔
کینگروز نے ہدف کے تعاقب میں بیٹنگ شروع کی تو متیھیو شارٹ 19 کے مجموعی سکور پر اور اوپنر جیک فریزر 16 رنز بنا کر 28کے مجموعی سکور پر پویلین لوٹ گئے۔
سٹیو سمتھ اور جوش انگلس کے درمیان تیسری وکٹ کی شراکت میں 85 رنز بنے، اس طرح 113 کے مجموعی سکور پر سٹیو سمتھ 44 رنز اور بعدازاں 139 کے مجموعی سکور پر جوش انگلس 49 رنز بنا کر آئوٹ ہو گئے۔
دونوں بلے بازوں کے آئوٹ ہونے کے ساتھ آسٹریلوی بیٹنگ لائن لڑکھڑا گئی اور مارنس لبوشین 16 جبکہ گلین میکسویل صفر پر آئوٹ ہو گئے، ایرون ہارڈی 10 رنز بنا کر محمد حسنین کا شکار بنے۔
اس کے بعد کپتان پیٹ کمنز نے ذمہ دارانہ بلے بازی کا مظاہرہ کیا اور ٹیم کی نیا پار لگائی اور اس طرح آسٹریلیا نے 204 رنز کا ہدف 33.3 اوورز میں حاصل کر کے سیریز میں ایک صفر کی برتری بھی حاصل کر لی۔
پاکستان کی جانب سے حارث رئوف نے 3 کھلاڑیوں کو آئوٹ کیا جبکہ شاہین آفریدی نے 2، نسیم شاہ اور محمد حسنین نے ایک ایک وکٹ حاصل کی۔
