پاکستانی ہاکی پلیئر سفیان خان کو انٹرنیشنل ہاکی کے سالانہ ایوارڈ گالا میں ان کی کارکردگی پر رائزنگ اسٹار کیٹیگری میں ایوارڈ سے نوازا گیا.
انٹرنیشنل ہاکی کی رائزنگ اسٹار کیٹیگری میں پہلا ایوارڈ جیتنے والے ہاکی پلیئر سفیان خان نے اپنا ایوارڈ پاکستان کے نام کرنے کا اعلان کرتے ہوئے پاکستان ہاکی کیلئے نیک خواہشات کا اظہار بھی کیا۔
سالانہ ایوارڈ گالا کی تقریب گزشتہ روز انعقاد پذیر ہوئی، جس میں پاکستانی کے ہاکی پلیئر سفیان خان کو رائزنگ اسٹار کیٹیگری میں ایوارڈ سے نوازا گیا، ایوارڈ جیتنے کے بعد انہوں نے کہا کہ پاکستان ہاکی میں ہمیشہ سے نمایاں مقام رکھتا ہے۔
اولمپکس، ورلڈکپ سمیت بے شمار انٹرنیشنل ایونٹس میں پاکستان نے فتوحات حاصل کر کے اپنی برتری ثابت بھی کی ہے، اب بھی پاکستان کی ہاکی ختم نہیں ہوئی، لڑکوں میں بے پناہ ٹیلنٹ ہے۔
خواہش ہے کہ ایک بار پھر پاکستان ہاکی کی دنیا میں پہلے جیسا مقام حاصل کرے، ملک کی نیک نامی کے لیے جو بھی ممکن ہو سکا میں کرنے کو تیار ہوں۔
انہوں نے بات چیت کرتے ہوئے مزید کہا کہ سالانہ ایوارڈ گالا کی تقریب میں ایوارڈ حاصل کر کے میں بہت خوش ہوں، اس کے لئے میں اپنے تمام کوچز، ساتھی کھلاڑیوں، دوستوں اور فیملی کا بہت شکر گزار ہوں۔
سفیان خان نے مزید کہا کہ انٹرنیشنل ہاکی فیڈریشن کی طرف سے ایوارڈ ملنے کے نتیجہ میں بہت حوصلہ افزائی ہے اور مزید آگے بڑھنے کا جذبہ بھی پیدا ہوا ہے۔ مستقبل میں اپنے وطن پاکستان کا نام روشن کرنے کے لئے ہاکی کے میدانوں میں اچھی کارکردگی کا مظاہرہ جاری رکھوں گا.
