بھارتی بیٹر ویرات کوہلی نے پرتھ ٹیسٹ کے دوران سابق لیجنڈری بلے بازوں سچن ٹنڈولکر اور ڈان بریڈ مین کے ریکارڈ توڑ دئیے۔
بھارتی اسٹار بلے باز ویرات کوہلی نے پرتھ میں آسٹریلیا کے خلاف بارڈر گواسکر ٹرافی کے پہلے ٹیسٹ میچ کے دوران اپنے ٹیسٹ کیریئر کی 30 ویں سنچری مکمل کی جو کہ آسٹریلیا کی سرزمین پر ان کی 7 ویں سنچری ثابت ہوئی۔
اس سنچری کے ساتھ ہی بھارتی اسٹار بیٹر کوہلی آسٹریلیا کی سرزمین پر سب سے زیادہ 7 سنچریاں بنانے والے بھارتی بلے باز بھی بن گئے۔ قبل ازیں بھارتی لیجنڈ بیٹر سچن ٹنڈولکر آسٹریلیا کی سرزمین پر 6 ٹیسٹ سنچریاں بنا کر سب سے زیادہ ٹیسٹ سنچریاں بنانے والے بھارتی بیٹسمین تھے۔
یاد رہے کہ سچن ٹنڈولکر نے یہ کارنامہ 20 ٹیسٹ میچز کھیل کر انجام دیا تھا جبکہ کوہلی نے یہ کارنامہ صرف 14 میچوں میں 7 سنچریاں بنا کر سر انجام دیا ہے، جس وجہ سے ان کا یہ کارنامہ اہمیت کا حامل ہے.
اس کے ساتھ ہی بھارتی اسٹار کوہلی نے اپنی 30 ٹیسٹ سنچری بنا کر کرکٹ کی تاریخ کے عظیم ترین آسٹریلوی بیٹسمین سر ڈان بریڈ مین کو بھی پیچھے چھوڑ دیا ہے، یاد رہے کہ ڈان بریڈ مین نے ٹیسٹ کرکٹ میں 29 سنچریاں بنائی تھیں۔
یہ بھی واضح رہے کہ بھارتی لیجنڈ سچن ٹنڈولکر ٹیسٹ کرکٹ کی تاریخ میں 51 سنچریوں کے ساتھ سر فہرست ہیں، جنوبی افریقا کے اسٹار بیٹر جیک کیلس 45 ٹیسٹ سنچریوں کے ساتھ دوسرے نمبر پر جبکہ آسٹریلوی اسٹار بیٹر رکی پونٹنگ 41 سنچریوں کے ساتھ تیسرے نمبر پر موجود ہیں۔
