ہفتہ کی شب سے ملک بھر میں سوشل میڈیا سروسز ایک بار پھر سست روی سے دوچار، صارفین کیلئے ڈان لوڈنگ اور معمول کے کام بھی ناممکن ہو گئے۔
اس وقت ملک بھر میں تمام سوشل میڈیا پلیٹ فارمز بشمول واٹس ایپ، فیس بک، انسٹا گرام اور ٹک ٹاک عارضی طور پر معطل ہیں یا سست روی کا شکار ہیں، ملک کے مختلف علاقوں میں سوشل میڈیا سروسز تاحال متاثر ہونے کی وجہ سے صارفین کو مشکلات کا سامنا کرنا پڑ رہا ہے، تمام متعلقہ امور تعطل کا شکار ہیں۔
ملک بھر میں تمام سوشل میڈیا پلیٹ فارمز ہفتہ کی رات سے تعطل کا شکار ہوئے ہیں جس سے پی ٹی سی ایل انٹرنیٹ اور گوگل سروسز کو اپنے معمول کے آپریشنز انجام دینے میں دشواری کا سامنا ہے۔
گزشتہ شب سے واٹس ایپ پر بھی ڈان لوڈنگ میں شدید مشکلات درپیش ہونے سے صارفین کے بہت سے کام تعطل کا شکار ہوئے پڑے ہیں، جس کی وجہ سے ملک بھر میں آن لائن کام کرنے والے تمام صارفین ہاتھ پر ہاتھ دھرے بیٹھے ہیں۔
ملک بھر میں ہونے والے سوشل میڈیا پلیٹ فارمز کے اس تعطل کی وجوہات تاحال سامنے نہیں آ سکیں جبکہ پاکستان ٹیلی کمیونی کیشن اتھارٹی ( پی ٹی اے ) کی طرف سے بھی تاحال اس حوالے سے کوئی بیان جاری نہیں کیا گیا۔
