پاکستان کے نامور تھیٹر اداکار اور کامیڈین نسیم وکی کا کہنا ہے کہ مجھے لگتا ہے کہ کامیڈی نائٹس ود کپل میں کام کرنا میری سب سے بڑی غلطی تھی۔
کامیڈین نسیم وکی نے یہ بات حال ہی میں ساتھی مزاحیہ اداکار و میزبان احمد علی بٹ کی پوڈ کاسٹ میں بطور مہمان شرکت کرتے ہوئے کہی، اس موقع پر انہوں نے ساتھی فنکاروں کے رویے پر مایوسی کا اظہار بھی کیا۔
دو اداکاروں اور میزبانوں کا نام لیتے ہوئے انہوں نے کہا کہ میں ان کا بہت احترام کرتا ہوں لیکن انہوں نے میرے بارے میں کچھ تبصرے و بیانات اس طرح دیئے کہ سرحد پار جا کر کام کرنا کوئی بہت بڑی کامیابی نہیں۔
ان میں سے ایک میزبان کو تو میں ذاتی طور پر جانتا تک بھی نہیں ہوں۔ مجھے سرحد پار کام کرنے سے محبت و تعریف سے زیادہ تنقید اور مخالفت کا سامنا کرنا پڑا ہے۔
اس تنقید اور مخالفت پر انہوں نے مایوسی کا اظہار کرتے ہوئے مزید کہا کہ مجھے شرمندگی ہے، میری زندگی کی سب سے بڑی غلطی ہے کہ میں نے کامیڈی نائٹس ود کپل میں کام کیا جس کی وجہ سے مجھے کبھی کوئی فائدہ نہیں ہوا۔
سرحد پار جا کر کام کرنے پر نہ کوئی پزیرائی ملی بلکہ بین الاقوامی سطح پر پاکستان کی نمائندگی کرنے پر الٹا مجھ پر اور میرے کام پر تنقید ہی کی گئی کہ میں نے وہاں جا کر کیا ہی کیا ہے؟
انہوں نے مزید کہا کہ پاکستانی انڈسٹری میں کامیڈین بغیر سکرپٹ کے کام کرتے ہیں، اس لیے کامیاب نہیں ہوتے خاص طور سے تھیٹر میں اب کوئی بھی نوجوان اداکار ریہرسل کرتا نظر نہیں آتا، یہی وجہ ہے کہ گزشتہ 10 برس کے دوران کوئی نیا ٹیلنٹ کامیڈی کے میدان میں ابھر کر سامنے نہیں آ سکا۔
