معروف ٹیلی کام آپریٹر ٹیلی نار نے ٹریول ایجنٹس ایسوسی ایشن کے تعاون سے بین الاقوامی مسافروں کی سہولت کیلئے ٹریول سم متعارف کرا دی۔
اس حوالے سے جاری کردہ اعلامیہ کے مطابق ٹیلی نار پاکستان اور ٹریول ایجنٹس ایسوسی ایشن آف پاکستان کے درمیان ایم او یو طے پا گیا ہے جس پر دونوں اداروں کے ذمہ داران نے دستخط بھی کر دئیے ہیں۔
اس اعلامیہ کے مطابق اسٹریٹیجک تعاون کے ذریعے ٹریول ایجنٹ اپنے کلائنٹس کو ٹریول پیکجز میں جدید ترین ٹریول سم کی پیش کش کر سکیں گے۔
اس سے بیرون ملک سفر کرنے والے مسافروں کے لیے بغیر کسی رکاوٹ کے ٹیلی نار کی رومنگ سروسز کا استعمال کرتے ہوئے مواصلاتی تجربے کو یقینی بنایا جا سکے گا۔
شراکت داری کے تحت بین الاقوامی مسافروں کے لیے خصوصی پیکجز پیش کیے جا رہے ہیں۔ کم قیمت رومنگ پیکجز کے ساتھ اس سم کو ایسا ڈیزائن کیا گیا ہے جو سفر کو آسان اور رابطے کو مسلسل برقرار رکھ سکے گی۔
خاص طور پر عمرہ اور دیگر ممالک جیسے مشرق وسطی، امریکا اور یورپ کے مسافروں کے لیے خصوصی بنڈلز بھی بنائے گئے ہیں۔
ٹی اے اے پی کے چیئرمین نعیم شریف کے مطابق ٹیلی نار پاکستان کے ساتھ یہ تعاون ٹی اے اے پی کے لیے ایک نیا باب ہے۔
ہمارا مقصد اپنے کلائنٹس کو ناصرف اضافی سہولت فراہم کرنا ہے بلکہ ہمارا مقصد بین الاقوامی مسافروں کو عالمی معیار کے کنیکٹیویٹی سلوشنز فراہم کرنا بھی ہے جو پریشانی سے پاک رابطوں کو یقینی بنائے گا۔
