پاک فوج کے شعبہ تعلقات عامہ کے مطابق سکیورٹی فورسز کی جانب سے پاک افغان بارڈر پر خوارج کی دراندازی کی کوشش کو ناکام بنا دیا گیا۔
آئی ایس پی آر کے مطابق ضلع ژوب کے علاقہ سمبازا میں خوارج کی طرف سے ایک اور دراندازی کی کوشش کی گئی، جس پر سکیورٹی فورسز کی طرف سے موثر کارروائی کی گئی، جس کے دوران 6 خوارج جہنم واصل ہو گئے۔
پاک فوج کے شعبہ تعلقات عامہ کے مطابق اس موثر کارروائی کے دوران مارے جانے والے خوارج کے قبضہ سے بڑی مقدار میں اسلحہ اور گولہ بارود بھی برآمد ہوا ہے۔
آئی ایس پی آر کا کہنا ہے کہ پاکستان افغان عبوری حکومت سے بارہا کہتا آ رہا ہے کہ وہ اپنی جانب بارڈر مینجمنٹ کو موثر بنائے، توقع ہے کہ افغان عبوری حکومت اپنی ذمہ داری پوری کرنے کی کوشش کرے گی۔
پاک فوج کے شعبہ تعلقات عامہ کے مطابق امید ہے کہ افغان حکومت اپنی سرزمین پاکستان کے خلاف دہشت گردی کی کسی بھی قسم کی کارروائی کے لئے استعمال کرنے کی اجازت نہیں دے گی۔
آئی ایس پی آر کا کہنا ہے کہ سکیورٹی فورسز سرحدوں کے تحفظ اور ملک سے دہشت گردی کے مکمل خاتمے کے لئے پرعزم ہیں اور اس سلسلے میں آئندہ بھی کسی بھی قسم کی قربانی سے دریغ نہیں کیا جائے گا۔
