چینی سوشل میڈیا ایپ ریڈ نوٹ پر امریکی خاتون نے چینی کمیونٹی سے اپنے سابق کلاس فیلو کی تلاش کے لیے مدد طلب کی۔
ایک امریکی خاتون کو سات برس کے طویل عرصے بعد چین میں اپنا کھویا ہوا دوست بالآخر مل ہی گیا۔ اس سلسلے میں 21 سالہ امریکن خاتون سیلیا نے چینی سوشل میڈیا ایپ ریڈ نوٹ پر چینی کمیونٹی سے اپنے سابق کلاس فیلو سائمن کی تلاش کے لیے مدد طلب کی تھی۔
اس سلسلے میں اپنی جذباتی ویڈیو میں انہوں نے بتایا کہ وہ 18-2017 میں آئیووا میں ایک نجی کیتھولک اسکول جایا کرتی تھیں جہاں ان کی دوستی سائمن جو کہ ایک چینی ایکسچینج طالب علم تھا اس کے ساتھ ہوئی۔ تاہم اس کے چین واپس لوٹ جانے کے بعد اس کے ساتھ رابطہ منقطع ہو گیا تھا۔
سیلیا نے مزید کہا کہ وہ چاہتی ہیں کہ اس ایپ پر موجود تمام صارفین ان کی مدد کریں، چینی برادری اس اپیل کے بعد سیلیا کی مدد کے لیے اکٹھی ہو گئی۔
خاتون نے سائمن کی ایک پرانی تصویر بھی شیئر کی جس کی پہچان کر کے کسی نے سائمن کو بتایا اور چند گھنٹوں بعد ہی سیلیا کی ویڈیو پر سائمن نے کمنٹ کر دیا۔
اپنے اس کمنٹ میں سائمن نے لکھا ہیلو، میں سائمن ہوں۔ میں نے کبھی سوچا بھی نہیں تھا کہ میں اپنی دوست کے ساتھ اس طرح برسوں بعد دوبارہ مل سکوں گا۔
اس نے مزید لکھا کہ ریڈنوٹ پر مدد کرنے والے ہر شخص کا بے حد شکریہ۔
