آئی سی سی چیمپئینز ٹرافی ٹکٹس کے حصول کے لئے کورئیر کمپنی کے آوٹ لیٹس کے باہر شائقین کرکٹ کی لمبی قطاریں لگ گئیں۔
پاکستان کرکٹ بورڈ (پی سی بی) کی جانب سے جاری کردہ اعلامیے کے مطابق ملک میں ہونے والے میچوں کے فزیکل ٹکٹس کی فروخت کا 3فروری سے آغاز ہو گیا ہے۔
فزیکل ٹکٹس فراہم کرنے والی کورئیر کمپنی ٹی سی ایس نے 26 شہروں کے 108آئوٹ لیٹس پر ٹکٹ کائونٹرز بنائے تھے تاہم شائقین کرکٹ کی بڑی تعداد کے باعث ٹکٹوں کا حصول مشکل ہو گیا ہے۔
آئوٹ لیٹس پر فریکل ٹکٹس کی فروخت کا آغاز پاکستانی وقت کے مطابق شام 4 بجے سے شروع ہوا 6 بجے تک جاری رہا، اس دوران کئی فینز ٹکٹ پانے میں کامیاب رہے تو متعدد افراد کو خالی ہاتھ گھروں کو لوٹنا پڑا۔
کورئیر کمپنی کی جانب سے ایک شناختی کارڈ پر 4 ٹکٹس جاری کیے گئے ہیں۔ اسی طرح بک کیے گئے آن لائن ٹکٹ 6 فروری جبکہ ٹکٹس کی ہوم ڈیلیوری 8 فروری کو کی جائے گی۔
شائقین کرکٹ کراچی، لاہور اور راولپنڈی میں ہونے والے دوسرے سیمی فائنل سمیت 10 میچوں کے ٹکٹ آن لائن اور نجی کوریئر کمپنی کے 100 سے زائد آوٹ لیٹس سے خرید سکیں گے۔
چیمپئینز ٹرافی ٹکٹس کی قیمت کا جائزہ لیا جائے تو جنرل اسٹینڈ ٹکٹ کی قیمتیں 1,000 پاکستانی روپے سے شروع ہوں گی جبکہ پریمیم سٹنگ مختلف کیٹیگریز میں 1,500 پاکستانی روپے سے دستیاب ہوں گی۔
یاد رہے کہ یہ ٹورنامنٹ پاکستان کی میزبانی میں چار مقامات کراچی، راولپنڈی، لاہور اور دبئی میں کھیلا جائے گا۔
ٹورنامنٹ کا آغاز 19 فروری کو کراچی میں میزبان پاکستان اور نیوزی لینڈ کے افتتاحی میچ سے ہو گا۔
