ذرائع کے مطابق پی ٹی آئی وکیل فیصل چودھری کو گزشتہ روز جیل افسر عمران ریاض کو گالیاں دینے پر گرفتار کیا گیا۔
اڈیالہ جیل میں داخلے سے روکنے پر انہوں نے جیل اہلکار سے تلخ کلامی کرتے ہوئے انہیں گالیاں بھی دیں، جس پر عمران خان کے وکیل فیصل چودھری کو اڈیالہ جیل کے باہر سے حراست میں لے لیا گیا۔
اس سے قبل پی ٹی آئی وکیل فیصل چودھری نے اڈیالہ جیل کے باہر گفتگو کرتے ہوئے کہا کہ میرے ساتھ جو کل ہوا وہ اندرونی گیٹ پر ہوا اس پر آج نوٹس ہو گیا ہے۔ میں نے عدالتی احکامات جیل سپرنٹنڈنٹ کو واٹس ایپ پر بھجوا دیے تھے۔
وکیل تحریک انصاف کا میڈیا سے گفتگو کرتے ہوئے مزید کہنا تھا کہ چھپے ہوئے چلمن سے لگے ہوئے ہیں، جنہوں نے ویڈیو ریلیز کی، میرا قصور یہ ہے کہ میں پاکستان تحریک انصاف کے بانی کی گفتگو باہر آ کر بیان کرتا ہوں۔
واضح رہے کہ گزشتہ روز اڈیالہ جیل میں داخلے سے روکنے پر بانی تحریک انصاف عمران خان کے وکیل فیصل چودھری غصے میں آ گئے تھے، ان کی جیل اہلکار سے تلخ کلامی ہوئی اور انہوں نے گالیاں بھی دی تھیں۔
جس پر نوٹس لیتے ہوئے انہیں اڈیالہ جیل کے باہر سے گرفتار کر لیا گیا.
