شام کے نئے صدر احمد الشرع کی اہلیہ لطیفہ الشرع سعودی عرب اور ترکیہ کے دورے کے دوران بھی ان کے ہمراہ تھیں۔
بشار الاسد کا دھڑن تختہ کر کے عبوری حکومت کے سربراہ بننے والے احمد الشرع نے سعودی عرب کے دورے میں اہلیہ لطیفہ سمیر الدروبی کے ساتھ عمرہ ادا کیا۔
عرب میڈیا کے مطابق کرشماتی شخصیت کے مالک شام کے نئے صدر احمد الشرع کی بڑھتی ہوئی مقبولیت کے ساتھ پہلی بار ان کی اہلیہ نے بھی میڈیا کی توجہ حاصل کر لی۔ لطیفہ الدروبی نے ترکیہ کی خاتون اول سے ملاقات بھی کی۔
دورے کے دوران ہونے والی ان ملاقاتوں کے بعد لطیفہ اندروبی کی شخصیت کے بارے میں تجسس بڑھ گیا جو اب تک گمنامی میں تھیں۔ خیال رہے کہ العربیہ چینل کو انٹرویو میں احمد الشرع نے ماضی کے کٹھن دور کا زکر کرتے ہوئے بتایا تھا کہ ان کی وجہ سے اہلیہ بھی پہاڑوں میں ساتھ رہنے پر مجبور تھیں۔
انہوں نے مزید بتایا تھا کہ اس مشکل دور میں ہمیں متعدد رہائش گاہیں تبدیل کرنا پڑی تھیں اور اہلیہ نے ہمیشہ سے خندہ پیشانی سے مشکلات کا سامنا کیا۔ احمد الشرع نے ایک ہی شادی کی ہے۔ لطیفہ الدروبی سے ان کے تین بیٹے ہیں۔
شامی خاتون اول لطیفہ الشرع کے بارے میں ابھی تک زیادہ تفصیلات میسر نہیں تاہم اب تک دستیاب معلومات کے مطابق ان کا تعلق شامی قصبے القریطین کے ایک معروف مذہبی گھرانے سے ہے اور انھوں نے عربی زبان اور ادب میں ماسٹرز کی ڈگری حاصل کر رکھی ہے۔
میڈیا رپوٹ کے مطابق ان کے خاندان میں معروف مذہبی شخصیات شامل ہیں جیسے شیخ عبدالغفار الدروب جو ایک معروف قاری تھے۔ان کے آبا اجداد میں سے ایک علا الدین الدروبی 1920 میں دوسرے شامی صدر بنے تھے۔
تاہم صرف ایک ماہ بعد ہی علاالدین الدروبی کو 21 اگست 1920 کو قتل کردیا گیا تھا۔ انھوں نے سلطنت عثمانیہ کے سفیر کی حیثیت سے بھی خدمات انجام دی ہیں۔
