آئی سی سی کے ساتھ میچ پاسز کی ڈیل طے پا گئی، جس سے چیمپیئنز ٹرافی کے میچز دبئی جا کر دیکھنے والے شائقین کے ویزے کا مسئلہ حل ہو گیا۔
پاکستان کرکٹ بورڈ کے چیئرمین محسن نقوی نے چیمپیئنز ٹرافی کے میچز دبئی جا کر دیکھنے والے شائقین کو اہم خوش خبری سنا دی ہے۔
محسن نقوی نے پی سی بی سلیکشن کمیٹی کے اجلاس کے بعد صحافیوں سے غیر رسمی بات چیت کرتے ہوئے کہا کہ دبئی کے لیے ویزا کا مسئلہ حل ہو گیا ہے، جس کے پاس میچ کا کارڈ یا ٹکٹ ہو گا اس کو ویزا مل جائے گا۔
انہوں نے کہا کہ دبئی جانے کے حوالے سے چارٹرڈ فلائٹس کے لیے پی آئی اے سے بات کریں گے۔ آئی سی سی کے ساتھ میچ پاسز کی ڈیل طے پائی ہے جس کے تحت آئی سی سی سے طے شدہ رقم لی جائے گی۔
چیئرمین پی سی بی نے کہا کہ 16 فروری کو ٹرافی کی تقریب آئی سی سی کی آفیشل تقریب ہے جس میں مختلف ممالک کے لوگوں کو مدعو کیا گیا ہے۔
انہوں نے وفاقی دارالحکومت اسلام آباد میں نیا اسٹیڈیم بنانے کا اعلان کرتے ہوئے کہا کہ اسلام آباد کے پر فضا مقام پر نیا کرکٹ اسٹیڈیم بنے گا۔
نیشنل کرکٹ اکیڈمی کو نئے طریقے سے ڈیزائن کیا جائے گا، اکیڈمی کی بلڈنگ کو گرا کر نئے انداز سے بنائیں گے۔ قذافی اسٹیڈیم کے نئے فائو سٹار ہوٹل کی تزئین و آرائش اگلے ایک سال میں مکمل کر لی جائے گی۔
انہوں نے مزید کہا کہ این سی اے کے ٹریننگ گرائونڈ کو وسیع کریں گے جبکہ وی آئی پی باکسز کو چھ سال کے لیے رینٹ پر دیں گے اور ہر باکس کی قیمت 10 کروڑ روپے رکھی جائے گی، 24 باکسز میں سے کچھ سیریز ٹو سیریز رینٹ کریں گے اور باقی کچھ مدت کے لیے رینٹ کئے جائیں گے۔
