پاکستان کو چیمپئینز ٹرافی سے قبل ہوم گرائونڈ پر کیویز سے بدترین شکست کا سامنا کرنا پڑا، جس نے اسکواڈ میں تبدیلیوں کا اشارہ دیدیا۔
لاہور کے قذافی اسٹیڈیم میں کھیلے گئے میچ میں مہمان نیوزی لینڈ نے پاکستان کو 78 رنز سے شکست دیکر سہ ملکی سیریز کا افتتاحی میچ جیت لیا، کیویز سے بدترین شکست نے پاکستانی ٹیم کے چیمپئینز ٹرافی سلیکشن کے اسکواڈ پر بھی سوالیہ نشان لگا دیا ہے۔
اس میچ میں قومی ٹیم نے بابر اعظم اور فخر زمان سے اوپننگ کروائی لیکن بابر فیل ہوئے، وہیں بالنگ لیڈر شاہین آفریدی اور نسیم شاہ کی بھی کیوی بیٹر نے خوب دھلائی کی۔
سہ ملکی سیریز کے اس میچ میں پاکستان نے اسپن بالنگ کے طور پر ابرار احمد، خوشدل شاہ اور سلمان آغا سے بالنگ کروائی لیکن ابرار کے علاوہ دونوں اسپنرز وکٹ لینے سے قاصر رہے۔
برصغیر کی کنڈیشنز میں تجربہ کار کرکٹرز نے پہلے بھی سلیکشن پر سوال اٹھایا تھا کہ تمام ٹیمیں اسپنرز کیساتھ میدان میں اتر رہی ہیں جبکہ گرین شرٹس نے محض ایک اسپشلسٹ اسپنر کو کھلایا ہے یہ فیصلہ انہیں مشکل میں ڈالے گا اور قذافی اسٹیڈیم میں ایسا ہی ہوا۔
سابق کرکٹرز چیمپئینز ٹرافی اسکواڈ میں سفیان مقیم اور آل رائونڈر کے شعبے میں عامر جمال کو شامل کرنے کا مطالبہ کر رہے ہیں کیونکہ کیویز کی جانب سے قذافی اسٹیڈیم میں اسپنر نے 6 وکٹیں لیں، جس میں مچل سینٹنر نے 3، مائیکل بریسویل 2 اور گلین فلپس نے ایک وکٹ حاصل کی۔
ٹورنامنٹ شروع ہونے سے قبل ہی موجودہ اسکواڈ کی سلیکشن پر وسیم اکرم، کامران اکمل، باسط علی، احمد شہزاد سمیت کئی کرکٹرز نے سوال اٹھایا تھا اور اسپنر اور آل رائونڈر عامر جمال کو شامل کرنے کا مطالبہ کیا تھا۔
