ماہرین نے خلا میں یہ روشنی کا دائرہ انتہائی طاقتور ٹیلی اسکوپ کے ذریعے زمین سے کروڑوں نوری سال کے فاصلے پر دریافت کیا ہے۔
خلا میں تیرتی ایک انتہائی طاقتور ٹیلی اسکوپ نے دور دراز کہکشاں کے گرد ایک نایاب روشن آئنسٹائن رنگ دریافت کیا ہے۔
یورپی خلائی ایجنسی کی یوکلڈ ٹیلی اسکوپ نے زمین سے کم و بیش 50 کروڑ نوری سال کے فاصلے پر موجود کہکشاں این جی سی 6505 کے گرد موجود روشن ہالے کی عکس بندی کی ہے۔
یہ روشنی کا دائرہ ایک دوسری کہکشاں کی وجہ سے بن رہا ہے جو کہ زمین سے 4.42 ارب نوری سال کے فاصلے پر موجود ہے اور این جی سی 6505 کے عین پشت پر موجود ہے۔
جرنل آسٹرو نومی اینڈ آسٹرو فزکس میں شائع ہونے والی ان تصاویر میں دیکھا جا سکتا ہے کہ پشت پر موجود کہکشاں سے آنے والی روشنی این جی سی 6505 کی کشش سے مسخ ہو رہی ہے۔
اوپن یونیورسٹی کے ایک ماہر فلکیات پروفیسر اسٹیفن سرجنٹ کا کہنا ہے کہ ابتدائی ڈیٹا کے مطابق یہ ایک خوب صورت، غیر معمولی، دلچسپ اور خوش قسمت دریافت بن کر سامنے آئی ہے۔
ان کا مزید کہنا ہے کہ کسی آئنسٹائن رنگ کا اس قدر مکمل ہونا انتہائی نایاب ہوتا ہے۔ پس منظر میں موجود کہکشاں کو سامنے موجود کہکشاں کے سبب مسخ زمان و مکان کے ذریعے دیکھا جا سکتا ہے۔
