سلمان اکرم راجہ اینڈ پارٹی نے مجھے گرایا، مجھے نکالنے سے پہلے پارٹی کو میرا موقف سننا چاہئے تھا، شیر افضل مروت
سیاسی رہنما شیر افضل مروت نے کہا ہے کہ مجھے پارٹی سے پہلی بار نہیں کم از کم تیسری بار نکالا گیا، کیوں نکالا یہ سوال میں نے پارلیمان میں بھی کیا ہے۔
میڈیا رپورٹ کے مطابق انہوں نے مزید کہا کہ مجھے عمران خان نے نہیں نکالا ، نہ وہ میرے ساتھ ایسا کر سکتے ہیں کیونکہ برے وقتوں میں ان کے بہت قریب رہا، پارٹی میں لوگ میری مقبولیت سے جلتے ہیں۔
جیل میں عمران خان سے سیاسی ملاقاتیں میں نے شروع کروائیں، دوسری ملاقات کے بعد مجھے ہی ملاقاتوں سے باہر کر دیا گیا۔ سلمان اکرم راجہ اینڈ پارٹی نے مجھے گرایا، میں رہوں یا نہ رہوں، خان کیلئے کام کرتا رہوں گا۔
اچھا ہے اب ریلیکس ہو کر اپنا کام کروں گا۔ 26ویں ترمیم میں جنہوں نے ضمیر بیچا ان کو تو نہیں نکالا گیا، ہر ایم این ایز کو دو ارب آفر ہو رہے تھے، مجھے بھی اس کی آفر ہوئی تھی۔
انہوں نے شکوہ کرتے مزید کہا کہ میرے خلاف سازش ہوئی جس میں سیکرٹری جنرل کا بھی کردار تھا، مجھے نکالنے سے پہلے پارٹی کو میرا موقف سننا چاہیے تھا، سنے بغیر فیصلہ اندھیرنگری ہے۔
انہوں نے دعویٰ کیا کہ بیرسٹر گوہر، علی محمد خان، علی امین گنڈا پور، شہریار آفریدی، اسد قیصر، شاندانہ گلزار کے خلاف بھی سازشیں ہو رہی ہیں، موجودہ حالات میں کسی کا بھی مستقبل محفوظ نہیں ہے۔
