سوشل میڈیا پلیٹ فارمز پر قومی کرکٹر کے ہمشکل کی ویڈیو وائرل ہو رہی ہے، صارفین کے مطابق شائد نسیم کا جڑواں بھائی بھارت میں موجود ہے۔
فوٹو اینڈ ویڈیو شیئرنگ ایپ انسٹاگرام پر ایک ویڈیو تیزی سے وائرل ہو رہی ہے جس میں پاکستانی ٹیم کے فاسٹ بولر نسیم شاہ کے ہمشکل کو دیکھا جا سکتا ہے۔
قومی کرکٹر سے مشابہت رکھنے والا شخص یوٹیوب شو انڈیا گاٹ لیٹنٹ سے متعلق تنازع پر برہمی کا اظہار کر رہا ہے تاہم لوگوں کی توجہ ان کے بیان سے زیادہ ان کی نسیم شاہ سے حیرت انگیز مشابہت پر مرکوز ہے۔
وائرل ہونے والی اس ویڈیو میں نسیم شاہ کے ہمشکل شخص نے اظہار ناراضی کرتے ہوئے کہا کہ انڈیا گاٹ لیٹنٹ جیسے موضوعات پر غیر ضروری توجہ دی جا رہی ہے۔
ان کے مطابق اصل مسائل جیسے مہنگائی، آلودگی اور بے روزگاری پس پشت ڈال دیے گئے ہیں۔
ان کے سنجیدہ موقف کے باوجود سوشل میڈیا صارفین کی توجہ صرف ایک چیز پر مرکوز رہی اور وہ ان کی نسیم شاہ سے مشابہت ہے۔
ایک صارف نے تبصرہ کیا کہ یہ بالکل نسیم کا جڑواں بھائی لگ رہا ہے۔ دوسرے نے حیرت سے لکھا کہ کیا یہ نسیم شاہ ہی ہیں یا کوئی اور؟،
کچھ کرکٹ مداح تو کنفیوژ بھی ہو گئے اور سمجھے کہ یہ اصل میں نسیم شاہ ہی ہیں، ایک صارف نے مشورہ دیا کہ نسیم شاہ، بھائی انڈین ایشوز چھوڑو، چیمپئنز ٹرافی پر دھیان دو۔
دوسرے صارف نے ہنستے ہوئے لکھا کہ نسیم شاہ، بولنگ پر دھیان دو بھائی۔
