ہالی ووڈ کی اپنے وقت کی حسین ترین اداکارہ کیٹ ونسلیٹ نے مشہور زمانہ فلم ٹائٹینک سے شہرت کی بلندیوں کو چھوا تھا۔
میڈیا رپورٹس کے مطابق کیٹ ونسلیٹ اداکاری کے علاوہ اب ایک اور میدان میں قدم رکھ رہی ہیں، ٹائٹینک اسٹار کیٹ ونسلیٹ اب ہدایت کاری کے میدان میں جوہر دکھائیں گی۔
کیٹ ونسلیٹ کی طرف سے اپنے مداحوں کو خوش خبری سنائی گئی ہے کہ وہ اپنی ایک فیچر فلم ‘گڈبائے جون’ کی ہدایتکاری کرنے والی ہیں۔
اداکارہ کیٹ ونسلیٹ کے بیٹے جو اینڈرس نے اس فلم کا اسکرپٹ لکھا ہے جبکہ یہ فلم نیٹ فلکس اور ورکنگ ٹائٹل فلمز کے تحت برطانیہ میں شوٹ کی جائے گی۔
اس فلم میں ٹونی کولٹ، جانی فلن، اینڈریا رائزبرگ، ٹموتھی اسپال، کیت ونسلیٹ اور ہیلیں مرین جیسے مشہور اداکار اپنے جوہر دکھائیں گے۔
یہ فلم خونی رشتوں کے درمیان گھومتی ہے جو ایک بکھرے ہوئے خاندان کا حصہ تھے اور والدین کے درمیان علیحدگی کے باعث جدا ہو گئے تھے۔
ان بہن بھائیوں کا گروپ حادثاتی طور پر مشکل حالات میں ایک دوسرے سے ملتا ہے اور اس مشکل وقت سے انھیں آپس میں مل جل کر ایک ساتھ نکلنا پڑتا ہے۔
کیٹ ونسلیٹ اس فلم کی کامیابی کے لیے کافی پرامید نظر آتی ہیں تاہم ابھی فلم ابتدائی مراحل میں ہے اور ریلیز کی تاریخ کا اعلان بھی نہیں کیا گیا۔
یاد رہے کہ کیٹ ونسلیٹ 16 فروری 2025 کو بی اے ایف ٹی اے فلم ایوارڈز میں شرکت کریں گی، جہاں انہیں ‘لی’ فلم کے لیے بہترین برطانوی فلم کے طور پر نامزد کیا گیا ہے۔
وہ اس فلم کی پروڈیوسر بھی ہیں اور انھوں نے اس فلم میں فوٹو جرنلسٹ لی ملر کا کردار ادا کیا تھا۔
