اداکار فیروز خان کو یوٹیوبر رحیم پردیسی نے اپنے مکوں کے وار سے لہولہان کر دیا اور اس طرح فیروز خان باکسنگ مقابلہ ہار گئے۔
لاہور کے ایکسپو سینٹر میں منعقدہ ایک تھرلر باکسنگ میچ میں یوٹیوبر رحیم پردیسی نے معروف اداکار فیروز خان کو شکست دے دی۔ مقابلے میں رحیم نے فیروز کو 5 ویں رائونڈز کے بعد ناک آئوٹ کر دیا۔
رحیم پردیسی اور فیروز خان کے درمیان یہ باکسنگ میچ سوشل میڈیا پر ہونے والی گرما گرم بحث کا نتیجہ تھا۔ دونوں نے زبانی جھگڑے کے بجائے باکسنگ رنگ میں معاملات طے کرنے کا فیصلہ کیا تھا۔
فیروز خان نے رحیم کے چیلنج کو قبول کیا اور پھر یہ مقابلہ لاہور میں منعقد ہوا۔ مقابلے سے پہلے مشہور میوزک بینڈ ینگ اسٹنرز نے اپنی پرفارمنس سے حاضرین کے دلوں کو گرمایا۔
اس موقع پر اداکار فیروز خان کی اہلیہ ڈاکٹر زینب، بہن حمائمہ ملک اور بیٹا سلطان بھی ان کی سپورٹ کے لئے موجود تھے۔
اس مقابلے کے دوران رحیم پردیسی نے اپنی مہارت اور جوش کا مظاہرہ کیا جبکہ فیروز خان ہانپتے ہوئے اور توجہ کھوتے ہوئے نظر آئے۔
پانچویں رائونڈ میں رحیم نے فیروز کو ناک آئوٹ کر دیا اور میچ 1 کے مقابلے میں 4 پوائنٹس سے جیت لیا۔ فیروز کے چہرے پر زخم بھی آئے، لیکن دونوں نے ایک دوسرے کے لیے احترام کا مظاہرہ کیا۔
اس مقابلے کے بعد دونوں رنگ میں گلے ملے اور ایک دوسرے کی کارکردگی کی تعریف بھی کی۔ رحیم نے فیروز کی ہمت کو سراہا جبکہ فیروز نے رحیم کی مہارت کو تسلیم کیا۔
فیروز کی اہلیہ ڈاکٹر زینب نے انسٹاگرام پر ایک پوسٹ شیئر کرتے ہوئے لکھا، مجھے اپنے شوہر فیروز خان پر بے حد فخر ہے، وہ پہلی بار رنگ میں اترے، ایک مشکل مخالف کا سامنا کیا، دوسرے ہی رائونڈ میں خون بہنے کے باوجود پانچویں رائونڈ تک لڑتے رہے۔ یہ ایک اصل جنگجو کا جذبہ ہے۔
زینب کی اس پوسٹ پر فیروز نے کمنٹ کرتے ہوئے اپنی اہلیہ کے لیے محبت بھرا پیغام دیا۔ ان کی بہنیں دعا ملک اور حمائمہ ملک نے بھی پیار اور تعریف کے جذبات کا اظہار کیا۔
