پاکستانی ماڈل و اداکارہ کشف علی نے صائم ایوب کے ساتھ وائرل ویڈیو پر ردعمل دیتے ہوئے سوشل میڈیا پر چلنے والی افواہوں کو بے بنیاد قرار دیدیا۔
کشف علی نے انسٹاگرام اسٹوریز کے ذریعے مداحوں سے کہا کہ ”ہمارے ملک میں بے شمار اہم مسائل ہیں جن پر بات ہونی چاہیے، لیکن میڈیا اور عوام دونوں غیر ضروری باتوں میں دلچسپی لیتے ہیں”۔
کشف نے مزید کہا کہ ایک عام سی ویڈیو کو بہت بڑا مسئلہ بنا دیا گیا، ویڈیو میں موجود شخص کو آپ نہیں جانتے، جیسے آپ مجھے بھی نہیں جانتے۔ یہ صورتحال میرے لیے مضحکہ خیز ہے، لیکن میں کچھ نہیں کر سکتی، کیونکہ یہ ہمارے لوگوں کی عادت بن چکی ہے۔
واضح رہے کہ کشف علی پاکستانی کرکٹر صائم ایوب کے ساتھ ایک ویڈیو میں مغربی لندن میں دکھائی دی تھی، جس کے بعد سوشل میڈیا پر ان کے درمیان تعلقات بارے قیاس آرائیاں شروع ہو گئی تھیں۔
اس ویڈیو میں دونوں کو بولنگ کرتے، خوشی سے باتیں کرتے اور سیلفیاں لیتے ہوئے دیکھا جا سکتا ہے، جس پر مداحوں میں تجسس پیدا ہو گیا تھا۔
22 سالہ صائم فی الحال لندن میں موجود ہیں، جہاں وہ اپنے ٹخنے کی انجری کے علاج کے بعد صحت یابی کے مراحل سے گزر رہے ہیں۔ سوشل میڈیا پر گردش کرنے والی افواہوں میں دعوی کیا جا رہا تھا کہ دونوں ایک ساتھ وقت گزار رہے ہیں۔
اس کے علاوہ کشف علی کی اسنیپ چیٹ اسٹوریز میں شیئر کی گئی ویڈیوز نے ان افواہوں کو مزید ہوا دی، جس کے بعد صارفین نے دونوں کے درمیان دوستی یا قریبی تعلقات کے بارے میں قیاس آرائیاں شروع کر دی تھیں۔
اداکارہ نے ان افواہوں کو مسترد کرتے ہوئے کہا کہ یہ صرف ایک اتفاقی ملاقات تھی اور اسے بڑھا چڑھا کر پیش کیا جا رہا ہے۔ سوشل میڈیا صارفین اہم مسائل پر توجہ دینے کے بجائے غیر ضروری باتوں میں دلچسپی لیتے ہیں۔
فی الحال ان دونوں کے درمیان تعلقات بارے کوئی باضابطہ تصدیق نہیں ہوئی، تاہم سوشل میڈیا پر یہ موضوع کافی گرم ہے اور صارفین اس پر مختلف رائے دے رہے ہیں۔
