صدر ٹرمپ کے بڑے فیصلے کے تحت جوائنٹ چیف آف اسٹاف کے چیئرمین جنرل چارلس بران کو ان کے عہدے سے ہٹا دیا گیا۔
امریکی صدر ڈونلڈ ٹرمپ کے بڑے فیصلے سامنے آ گئے، جس کے تحت محکمہ دفاع میں بڑے پیمانے پر تبدیلیاں کرتے ہوئے امریکی دفاعی لائن ہلا کر رکھ دی گئی۔
صدر ٹرمپ نے جوائنٹ چیف آف اسٹاف کے چیئرمین جنرل چارلس بران کو ان کے عہدے سے ہٹا دیا۔
غیر ملکی خبر ایجنسی کے مطابق صدر ٹرمپ نے اعلان کیا ہے کہ وہ جنرل چارلس بران کی جگہ ریٹائرڈ لیفٹیننٹ جنرل ڈین “رازن” کین کو نامزد کریں گے۔
ریٹائرڈ لیفٹیننٹ جنرل ڈین “رازن” سابق ایف-16 پائلٹ اور سی آئی اے میں عسکری امور کے ایسوسی ایٹ ڈائریکٹر رہ چکے ہیں۔
امریکی صدر نے فوجی قیادت میں مزید تبدیلیوں کا بھی عندیہ دیا ہے جن میں امریکی فضائیہ اور بحریہ کے سربراہان کی برطرفی بھی شامل ہے۔
اس کے علاوہ پینٹاگون میں ملازمین کی تعداد میں نمایاں کمی کرتے ہوئے ساڑھے پانچ ہزار ملازمین کو فارغ کرنے کا فیصلہ بھی کیا گیا ہے۔
میڈیا رپورٹس کے مطابق یہ فیصلے امریکی فوجی اسٹیبلشمنٹ میں ہلچل پیدا کرنے کا سبب بنے ہوئے ہیں اور یہ فیصلے ٹرمپ دور حکومت میں فوجی پالیسی میں بڑی تبدیلیوں کی نشاندہی بھی کر رہے ہیں۔
یاد رہے کہ امریکی صدر نے پہلے بھی فوج میں اصلاحات اور قیادت کی تبدیلی کا عندیہ دیا تھا جسے اب عملی شکل دی جا رہی ہے۔
