آئی سی سی نے بھارت اور بنگلا دیش کے میچ کی نشریات کے دوران پاکستان کا نام لوگو میں نہ ہونے کی غلطی کا اعتراف کر لیا۔
انٹرنیشنل کرکٹ کونسل ( آئی سی سی ) نے چیمپئنز ٹرافی میں بھارت بمقابلہ بنگلا دیش میچ کی نشریات کے دوران پاکستان کا نام لوگو میں نہ ہونے کی غلطی کا اعتراف کرتے ہوئے معاملے کو تکنیکی خرابی قرار دے دیا۔
میچ کے دوران ناظرین نے براڈ کاسٹ میں دیکھا کہ ایک روز قبل ایونٹ لوگو پر جو پاکستان کا نام درج تھا وہ بھارت اور بنگلا دیش کے درمیان کھیلے گئے میچ کے دوران موجود نہیں تھا۔
آئی سی سی لوگو میں میزبان ملک کا نام موجود نہ ہونے سے متعلق انٹرنیٹ پر مختلف قیاس آرئیاں ہونے لگیں۔
تاہم، آئی سی سی نے جواب میں غلطی کا اعتراف کرتے ہوئے اس کو گرافکس کا مسئلہ قرار دیا۔
ترجمان آئی سی سی کا اس حوالے سے کہنا تھا کہ ایسا تکنیکی خرابی کی وجہ سے ہوا جو کہ کل سے ٹھیک ہو جائے گا۔ میچ کے دوران لوگو کا تبدیل کیا جانا ممکن نہیں تھا۔
ترجمان نے مزید واضح کیا ہے کہ میزبان ملک کا نام آئی سی سی سوشل میڈیا اکائونٹس پر شیئر کی جانے والی کلپس پر واضح ہو گا۔
