بھارتی اسپنر یوزویندر چہل اور ان کی اہلیہ معروف ڈانسر دھنا شری ورما نے 4 سال کی شادی کے بعد ایک دوسرے سے علیحدگی کا فیصلہ کرلیا۔
انسٹاگرام پر اپنی اسٹوری شیئر کرتے ہوئے بھارتی اسپنر یوزویندر چہل نے چاہنے والوں کی حمایت کا شکریہ ادا کیا اور اپنے تحریر کردہ بیان میں لکھا کہ خدا نے مجھے اتنی بار بچایا ہے کہ میں گن بھی نہیں سکتا۔
تو میں صرف تصور ہی کر سکتا ہوں کہ کتنی بار میں بچا ہوں اور مجھے معلوم بھی نہیں ہوا۔ شکریہ خدا، ہمیشہ میرے ساتھ رہنے کے لیے۔
ادھر دھنا شری ورما نے بھی اپنی انسٹاگرام پوسٹ میں ایمان اور بھروسے کی بات کرتے ہوئے لکھا کہ پریشانی سے برکت تک کا سفر! حیرت انگیز ہے کہ خدا کس طرح ہماری مشکلات کو برکت میں بدل دیتا ہے۔
آج اگر آپ کسی چیز کو لے کر پریشان ہیں، تو یاد رکھیں کہ آپ کے پاس ایک انتخاب ہے۔ آپ یا تو پریشان رہ سکتے ہیں یا پھر سب کچھ خدا کے سپرد کر کے دعا کا راستہ اپنا سکتے ہیں۔ ایمان کی طاقت کو کم نہ سمجھیں، خدا ہر چیز کو ہمارے بھلے کے لیے بہتر بنا سکتا ہے۔
قبل ازیں 4 سال کی شادی کے بعد سوشل میڈیا پر کئی ماہ سے ان کی علیحدگی کی افواہیں گردش کر رہی تھیں، دونوں نے مبہم پوسٹس بھی کیں، جو اشارہ دے رہی تھیں کہ وہ الگ ہو چکے ہیں تاہم کسی نے بھی واضح طور پر بات نہیں کی اور نہ ہی علیحدگی کی اصل وجوہات بتائیں۔
میڈیا رپورٹس کے مطابق ممبئی کے باندرہ فیملی کورٹ میں طلاق کی حتمی سماعت مکمل ہوئی، جہاں دونوں فریقین عدالت میں موجود تھے۔
جوڑے کو تقریبا 45 منٹ تک مشاورت کے لیے کہا تاکہ معاملات کو سلجھایا جا سکے تاہم مشاورت کے بعد دونوں نے باہمی رضامندی سے علیحدہ ہونے کے فیصلے پر قائم رہنے کا اظہار کیا۔
بالآخر عدالت نے باضابطہ طور پر دونوں کے درمیان طلاق کی منظوری دے دی اور یوں بھارتی کرکٹر یوزویندر چہل اور دھنا شری ورما کی شادی کا باب ہمیشہ کیلئے بند ہو گیا۔
واضح رہے کہ دھناشری جو کہ ایک ڈینٹسٹ سے ڈانسر اور کوریوگرافر بنیں، انہوں نے مشہور ریئلٹی شو “جھلک دکھلا جا” میں حصہ لیا تھا۔
