یہ نایاب اور پراسرار مچھلی عام طور پر 3,300 فٹ گہرے پانی میں رہتی ہے اور سطح کے قریب بہت ہی کم نظر آتی ہے۔
اسپین کے کینری جزائر میں ایک نایاب اور پراسرار مچھلی ساحل پر مردہ حالت میں پائی گئی، جس کے بعد قدرتی آفات سے متعلق خدشات نے جنم لے لیا۔
گہرے سمندر میں پائی جانے والی یہ مخلوق ساحل پر ایک سیاح نے دریافت کی، جس کی ویڈیو دیکھتے ہی دیکھتے وائرل ہو گئی۔ فوٹیج کے مطابق ایک شخص چمکدار چاندی کے رنگ کی مچھلی کو سمندر میں واپس دھکیلنے کی کوشش کر رہا ہے۔
اس پراسرار مچھلی کو جاپانی دیومالائی کہانیوں میں سمندی دیوتا کا پیغامبر کہا جاتا ہے اور اسے زلزلوں، سونامی اور طوفانوں کی آمد کی علامت بھی سمجھا جاتا ہے۔ یہ عام طور پر 3,300 فٹ گہرے پانی میں رہتی ہے جس کی وجہ سے اسے دیکھنا ایک نایاب واقعہ ہوتا ہے۔
سوشل میڈیا پر اس انوکھے واقعے نے کئی قیاس آرائیوں کو جنم دیا، ایک صارف نے لکھا، “یہ ہمیشہ کسی بڑی تباہی سے پہلے سامنے آتی ہے!” جبکہ دوسرے نے کہا، “کچھ برا ہونے والا ہے!”
کچھ صارفین نے اپیل کی کہ اس مچھلی کو فوری طور پر واپس سمندر میں چھوڑ دیا جائے تاکہ کسی ممکنہ زلزلے یا سونامی کے خطرے سے بچا جا سکے۔
اسی طرح کا واقعہ کیلیفورنیا میں بھی پیش آیا تھا، جہاں نومبر 2024 کے بعد دوسری بار ایک نایاب مچھلی ساحل پر ملی تھی جو کہ تقریبا 10 فٹ لمبی تھی۔
اس پراسرار مچھلی کی لمبائی 20 فٹ تک ہو سکتی ہے اور یہ عام طور پر سمندر کی گہرائی میں پائی جاتی ہے۔ اس کے ساحل پر ظاہر ہونے کو کئی لوگ تباہی کی پیشگوئی سے جوڑ رہے ہیں۔
