بجٹ سے پہلے ہی کاروباری حضرات سے ملاقاتیں شروع کر دیں، بجٹ میں تنخواہ دار طبقے پر بوجھ کم کرنے کا سوچیں گے، محمد اورنگزیب
میڈیا رپورٹ کے مطابق وفاقی وزیر خزانہ محمد اورنگزیب نے کہا ہے کہ اللہ کا شکر ہے کہ ملک میں معاشی استحکام آ رہا ہے، اسٹاک مارکیٹ اوپر جا رہی ہے۔ کرنسی میں بھی استحکام ہے اور پالیسی ریٹ بھی کم ہوا ہے۔
انہوں نے کہا کہ ہماری معیشت کی بنیاد بن گئی ہے، اب ہمیں پائیدار ترقی کی طرف جانا ہے۔ بجٹ سے پہلے ہی کاروباری حضرات سے ملاقاتیں شروع کر دی ہیں، ایف بی آر میں اصلاحات پر بھی کام کر رہے ہیں۔
ان کا کہنا تھا کہ تنخواہ دار طبقے پر ٹیکسز کا بوجھ ہے، آنے والے بجٹ میں ان پر بوجھ کم کرنے کا سوچیں گے۔ پاکستان کی تاریخ میں پہلی مرتبہ ٹیکس نظام میں بہتری آئی ہے۔
انہوں نے کہا کہ ریئل اسٹیٹ میں بھی ٹیکس بہتری آئی ہے، ریئل اسٹیٹ سیکٹر میں سٹہ بازی نہیں چلنے دیں گے، تعمیراتی انڈسٹری کی سپورٹ کے لیے کام جاری ہے۔
وزیر خزانہ کا مزید کہنا تھا سعودی عرب، دبئی اور واشنگٹن میں سب سے ملاقاتیں ہوئیں، اوورسیز میں کوئی ناراضی نہیں ہے، ملک میں 35 ملین ڈالر تک زر مبادلہ پہنچ چکا ہے، روشن ڈیجیٹل اکائونٹ میں بھی پہلے سے زیادہ اضافہ ہوا ہے۔
