حماس نے 6 اسرائیلی یرغمالیوں کو رہا کیا، جس پر اسرائیل نے 600 سے زائد فلسطینی قیدیوں کو رہا کرنا تھا مگر اب نیتن یاہو کا یوٹرن سامنے آ گیا۔
اسرائیلی وزیراعظم نیتن یاہو کا یوٹرن لیتے ہوئے حماس کی جانب سے رہا کیے جانے والے 6 یرغمالیوں کے بدلے فلسطینی قیدیوں کی طے شدہ رہائی موخر کرنے کا فیصلہ۔
اسرائیلی وزیراعظم آفس کی جانب سے جاری کردہ بیان میں کہا گیا کہ حماس کی طرف سے ہمارے قیدیوں کی عزت کو مجروح کرنے والی تقریبات اور پراپیگنڈے کے لیے ان کا مذموم سیاسی استعمال فلسطینی قیدیوں کی رہائی کو موخر کرنے کی وجہ بنا ہے۔
بیان میں مزید کہا گیا ہے کہ فلسطینی قیدیوں کی رہائی اس وقت تک موخر رہے گی جب تک ہمارے اگلے قیدیوں کی رہائی عزت کو مجروح کرنے والی تقریبات کے بغیر نہیں ہوتی۔
واضح رہے کہ فلسطینی قیدیوں کی رہائی میں کئی گھنٹے تاخیر کے بعد یہ بیان جاری کیا گیا ہے جبکہ فلسطین کے مغربی کنارے میں تاحال سیکڑوں خاندان کئی سالوں سے اسرائیلی جیلوں میں قید اپنے پیاروں کی رہائی کی امید لیے ان کے منتظر ہیں۔
دوسری جانب اسرائیل کی طرف سے 6 یرغمالیوں کے بدلے 600 سے زائد قیدیوں کو رہا نہ کرنے پر فلسطین کی مزاحمتی تنظیم حماس نے بھی سخت ردعمل جاری کر دیا ہے۔
تل ابیب کے اقدام پر حماس کی جانب سے جاری ردعمل میں کہا گیا ہے کہ اسرائیلی وزیراعظم جنگ بندی معاہدے کو سبوتاژ کرنے کے لیے گھنائونا کھیل کھیل رہے ہیں۔
حماس نے مزید کہا ہے کہ غزہ میں قیدیوں کی رہائی کا منظر دو اسرائیلی یرغمالیوں نے گاڑی سے دیکھا جس کی ویڈیو بھی جاری کر دی گئی ہے، دونوں یرغمالیوں نے اپنی حکومت سے رہائی ممکن بنانے کی اپیل کی۔
