نئی دہلی ۔بھارتی ٹی وی اور فلم انڈسٹری کے معروف اداکار امن ورما کی شادی کے حوالے سے حالیہ خبریں سامنے آ رہی ہیں، جن میں کہا جا رہا ہے کہ وہ اپنی اہلیہ وندانا لالوانی سے علیحدگی کے قریب ہیں۔
امن ورما، جنہوں نے اپنے کیریئر کا آغاز ٹی وی شوز سے کیا اور بعد ازاں فلموں میں بھی کامیاب کردار ادا کیے، اپنی شادی کے حوالے سے میڈیا کی توجہ کا مرکز بن چکے ہیں۔
امن ورما کی شادی 2016 میں ہوئی تھی، جب انہوں نے وندانا لالوانی کے ساتھ اپنی زندگی کا سفر شروع کیا تھا، مگر 9 سال بعد یہ رشتہ اب کشمکش کا شکار ہوگیا ہے۔
امن ورما اور وندانا لالوانی کے درمیان طویل عرصے سے تعلقات میں سرد مہری اور اختلافات آ رہے تھے، جنہیں بہتر بنانے کی مسلسل کوششیں کی گئیں، لیکن آخرکار دونوں نے یہ فیصلہ کیا کہ وہ اس شادی کو مزید نہیں چلا پائیں گے۔
رپورٹس کے مطابق، وندانا لالوانی نے علیحدگی کا فیصلہ لیا ہے اور انہوں نے اس رشتہ کو مزید جاری رکھنے کی خواہش ظاہر نہیں کی۔
یاد رہے کہ امن ورما اور وندانا لالوانی کی ملاقات 2014 میں ہوئی تھی جب دونوں ڈرامہ “ہم نے لی ہے شپت” کے سیٹ پر ایک دوسرے کے قریب آئے تھے۔ 2015 میں انہوں نے منگنی کی تھی اور ایک سال بعد شادی کے بندھن میں بندھ گئے تھے۔
دلچسپ بات یہ ہے کہ دونوں نے فیملی بڑھانے کے منصوبے بنائے تھے، مگر تعلقات میں بڑھتی ہوئی مشکلات کے باعث وہ یہ خواہش پوری نہیں کر سکے۔ اب دونوں کے درمیان فیصلہ کن لمحہ آ چکا ہے، جس میں علیحدگی کا فیصلہ کیا گیا ہے۔
رپورٹس کے مطابق، امن ورما نے اس صورتحال پر ابھی تک باضابطہ بیان نہیں دیا ہے، تاہم وہ اس مشکل دور سے گزر رہے ہیں اور فی الحال اس رشتہ کے مستقبل کے بارے میں کوئی تفصیلات فراہم نہیں کی ہیں۔
