بالی وڈ کے مشہور اداکار امیتابھ بچن کی حالیہ ٹوئٹ نے سوشل میڈیا پر نئی بحث کو جنم دیا۔
امیتابھ بچن نے ایکس (ٹوئٹر) پر ایک مختصر مگر پراسرار پیغام شیئر کیا جس میں انہوں نے لکھا تھا، ’’Time to go‘‘ (جانے کا وقت آ گیا ہے)، جس نے مداحوں میں بے چینی پیدا کر دی۔
اس ٹوئٹ کے منظر عام پر آتے ہی سوشل میڈیا پر مختلف اندازے لگائے جانے لگے۔ کچھ افراد نے یہ خیال ظاہر کیا کہ یہ پیغام امیتابھ بچن کے کیریئر کے اختتام یا ان کے مشہور بھارتی کوئز شو ’’کون بنے گا کروڑ پتی‘‘ سے ریٹائرمنٹ کے بارے میں تھا۔
دوسری جانب، کچھ مداحوں نے اس پیغام کو ان کی صحت سے جوڑا اور ان کے حوالے سے فکرمندی کا اظہار کیا۔ اس پراسرار ٹوئٹ نے فوراً سوشل میڈیا پر سوالات کی ایک لہر اٹھا دی۔
تاہم، امیتابھ بچن کی ٹوئٹ کے بارے میں ابہام کا جواب ’’کون بنے گا کروڑ پتی 16‘‘ کے تازہ ترین ایپی سوڈ میں سامنے آیا۔
اس شو کے دوران ایک مداح نے بگ بی سے ان کی ٹوئٹ ’’Time to go‘‘ کی وضاحت پوچھی۔ اس پر امیتابھ بچن نے ہنستے ہوئے کہا، ’’یہ صرف ایک لائن تھی، جس کا مطلب تھا کہ کام سے جانے کا وقت آ گیا ہے، تو اس میں آخر کیا مسئلہ ہے؟‘‘
ایک مداح نے سوال کیا، ’’سر، کہاں جانے کا وقت ہے؟‘‘ تاہم اس سوال کا جواب دینے سے پہلے ہی پورا اسٹوڈیو یک آواز ہو کر بولا، ’’آپ یہاں (شو) سے نہیں جا سکتے!‘‘
اس پر امیتابھ بچن نے مذاق کرتے ہوئے کہا، ’’ارے! ہمارے کام سے جانے کا وقت آ گیا ہے۔ آپ عجیب باتیں کرتے ہیں! رات کے 2 بجے ہمیں شو سے چھٹی ملتی ہے اور گھر پہنچتے پہنچتے کافی دیر ہو جاتی ہے، یہی لکھا تھا، لیکن لکھتے ہوئے نیند آ گئی اور ٹوئٹ ادھورا رہ گیا۔‘‘
اس وضاحت کے بعد، امیتابھ بچن نے تمام افواہوں اور قیاس آرائیوں کا خاتمہ کیا اور اپنی ٹوئٹ کو ایک معمولی غلطی کے طور پر بیان کیا۔ ان کی وضاحت کے بعد مداحوں کی تشویش بھی ختم ہو گئی اور سوشل میڈیا پر ہنسی مذاق کا ماحول پیدا ہو گیا۔
